Aizawl : Mizoram Rural Bank (MRB) Chairman thar Sheryl L. Vanchhong-in nimin khan Chief Minister Zoramthanga hmuin, MRB hmalakna tlangpui leh ruahmanna an neihte a hrilh a, mipui ten tangkai zawka MRB an hman theih dan turte a sawipui.
MRB Chairman chuan Chief Minister-in recapitalisation lama an harsatna a sutkian sak avanga lawmthu hrilhin, MRB chu NE India huapa Rural Bank lian ber, tunhnai maia NABARD pawhin Best Regional Rural Bank-a a thlan an nih thu sawiin, Annual Capital Turn Over pawh vbc 4880 chuang a tlin thu a sawi bawk.
Chief Minister chuan, MRB chu an inzarpharh that avang leh an hnathawh that avangin mipuite hriat an hlawh nia sawiin, khawvel changkang zelah mitinin Bank nena inthlunzawm kan mamawh vek tawh avangin chumi kawngah chuan MRB hian hna a thawk tha a, kan lawm hle a ni, a ti. Hma an sawn zel theihna tura sorkar lama mamawh an neihte thlen zel thin turin a chah.
Tunah hian Mizoram Rural bank hian Branch 102 nei mekin thawktu nghet mi 475 an awm a, thingtlang hmun kilkhawr zawka mite tan Mini ATM hi 270 nei mekin a dang 75 neih belh tumin hma an la mek a. Financial Inclusion lama hmalaknaah khawtina Self Help Group te nen an thawk ho tha hle niin an sawi a ni.