Central YMA, Mizo Zirlai Pawl (MZP), Mizo Hmeichhe Insuihkhawm Pawl (MHIP), Mizo Students’ Union (MSU) leh Mizoram Upa Pawl (MUP)-te awmkhawmna NGO Co-ordination Committee chuan Chief Minister Zoramthanga hnenah Forest Conservation Act, 1980 Amendment 2023 chungchanga ngaih pawimawh an neihte an thlen.
NGOCC chuan an lo rel tawh angin pawl aiawh president leh secretary theuhten nimin chawhma dar 10:15 khan chief minister chu a pisa-ah an kawm a. Forest Conservation Act, 1980 Amendment 2023, chungchangah chief minister chu a hmalakna mekah lawmawm an tih thu an hrilh a. Committee-in an thu relte an thlen bawk.
NGOCC chuan Manipur buaina avanga nun chân Zohnahthlakte vuina hun, August 3, 2023-a neih an tum chu buaina lian zawk a thlen loh nan central sorkarin ngenna Mizoram chief minister hnena an thlen chungchang hmalakna an sawi ho a. CM leh NGOCC chairman ten ITLF hruaitute biain he hun hi hmang rih lo turin ruahmanna an siam.
Hei bakah, Manipur raltlan chhawmdawlna tur central sorkara an thlen pawh rang taka ruahman anih tur thu an dawng bawk.
NGOCC chuan Nilainia Central YMA Committee Room-a thutkhawma an lo rel tawh angin, nimina Churachanpur-a ITLF in tual chhung buaina avanga an mi leh sa thite vuina hun an hman turah an senso atan Rs 2,00,000.00 pek ni se an tih bakah, Manipur-a Zohnahthlak unaute raldo (Frontline)-a awmte mamawh tul zual lei nan Manipur Group YMA kut-ah Rs 5,00,000 pek an rel bawk.