Aizawl: Ruihhlo tawlh rua puh, Lalengzauvi, Lunglei Venglai chu Special Court (NDPS Act), Lunglei district-in thiam loh chantir hnuah nimin hremna a puang.
March 18, 2021, chawhma dar 10:30 khan Excise & Narcotics-in heroin grame 331.500 (hawng 24) a kawl avangin Lalengzauvi hi a dawr nghah lai, Lunglei veng-ah man a ni a. END, Lunglei district-ah an man ni la la in thubuai siamsak nghal a ni.
Lalengzauvi thubuai hi F Roluahpuia, Judge, Special Court (NDPS Act), Lunglei district court chuan Nilaini khan a ngaihtuah a. Thu hretu mi pali te thu an zawhfiah hnuah, court dan anga thuhretu hrang hrang te thusawi leh finfiahna hrang hrangte enfiah a nih hnuah thiam loh chantir niin, Ningani khan court chuan thiam loh chantir avanga hremna a puang a ni.
Court chuan ruihhlo neitu Lalengzauvi chu NDPA Act hnuaiah thiam loh chantirin, rim taka kum 10 chhung jail tang tur leh pawisa Rs 1,00,000 chawi tura tiin, pawisa chawi tur a neih loh chuan kum khat dang jail tang belh leh turin a hrem a ni.
Thudawn danin, thiam loh chan tir tak Lalengzauvi hian India ram dan puiin a khap heroin-te hi Champhai atanga Rs 4,80,000-a lak, hlep uma Lungleia hralh a tum thu leh tun tum hi hetiang thil a tih vawi hnihna leh a tih hmasa zawkah man a tawh loh thu Court hmaah a puang a ni.
He thubuaiah hian sorkar aiawhin C. Vanlalmuani, Additional Public Prosecutor a ding a, Lalengzauvi aiawh hian ukil ZD Lalnunsanga, Advocate a ding thung.