Congress President Lalsawta’n BJP sorkarin sakhaw zalenna leh hnam ziarang te tana hlauhawm thilpui a tlehtir chiam avangin Mizoramin hun thim leh khirh a tawng mek tih sawiin, hemi do let turin Mizorama political party, NGO leh kohhran te a sawm.
Nimina Congress bhavana press conference a neihah Sawta chuan hnam nun leh ziarang nuai boa, hnam lian ber zawkte tih dan tawm ngai turin Uniform Civil Code hman tum mek a nih thu sawiin, ram dang nena ramri intawm state-te tana ram zau tak chhunga ram tuamtu – thing, mau, ramhmul, lui leh nungcha te tichereuva, environment tichhe bawk thei tur dan (Amendment Act, 2023) to Forest Conservation Act, 1980 pawh tun hnaiah parlianment in hnihah pawm a ni ta tih a sawi.
Congress president chuan, “Hetiang ruahmanna hian India ram inpumkhatna a tihderthawn theih avangin hun thim leh khirh kan tawn takah hian he thlipui do let turin Mizorama political party zawng zawng te, kohhran leh tlawmngai pawl zawng zawngte thawhhopuiah ka sawm a, a do letna dawhkan pawh din tûrin ka ngen nghal,” a ti a; he thlipui tlehtirtu ber, BJP emaw, NEDA emaw hmanga BJP thawhpuitute pawh BJP atanga inthiarfihlim turin a ngen tih a sawi bawk.
The Zozam Times zawhna kumin MLA inthlanpui neih tur atan candidate turte an tifel tawh em tih a zawhna chu chhangin Sawta chuan, “A vai vai a nih loh pawhin August thla chhung ngei chuan tihfel kan tum,” a ti a; Congress party hruaitute an inlungrual tha a, sawisel tur an neih loh thu a sawi bawk a ni.