FIFA Women’s World Cup-ah South Africa in a vawikhatna atan hnehna an chang a ni mai lova, a vawikhatna atan knockout stage khel turin Italy lakah hnehna pawimawh an chang.

Wellington Regional Stadium a Thawhlehni a Group G inkhelah South Africa hian huntawp dawnah Thembi Kgatlana goal khung hmangin 3-2 in Italy hi an hneh a. Point li hmuh phahin round of 16-ah Netherlands nen an intum dawn.

Italy hian tling turin draw bak an mamawh lova, an hlawhtling dawn niin a lang hman. Mahse striker Kgatlana hian huntawp dawn hun pekbelh minute hnih a kal tihin chakna goal a khung.

Italy in minute 10-naah forward Chiara Beccari penalty hlawhchhuah hmangin hma an hruai a, Arianna Caruso chuan goal-ah a chantir.

South Africa in Benedetta Orsi own goal an neih hnuah Hildah Magaia hmangin second half-ah hma an hruai a. Italy hian chance tha an hloh nual hnuah minute 74-naah Caruso hmangin an si phurh an sut a ni.

South Africa coach Desiree Ellis chuan a player-te fakin, “Player tin hian chak an tum em em a, rim taka an thawh rah a ni.” tiin hnehna an chan chu a sawi a.

“He hnehna hi kan ram a mi zawng zawngte tan a ni. Kan inkhel en turin zing hma tak takah an thova, Argentina laka chak tur kan nihlaia kan chak lote kha an lo la na hle. Chuvangin hlim taka ni an hman theih hi ka lo tiam tawh a ni.” a ti.

“Kan tualchhung league a coach te zawng zawng tan ka hlan bawk a, kan hma a coach te leh player zawng zawngte, kan ram hmeichhe football hmasawnna tura tha lo thawh tawhte zawng zawng tan a ni.” a ti bawk.

Inkhel dangah Sweden in Argentina lakah Rebecka Blomqvist leh Elin Rubensson te goal khung hmangin 2-0 in hnehna an chang a. Group hmahruaitu niin US hmeichhe team nen an intum leh dawn.

Brazil an haw a ngai

Chak mamawh Brazil in an mamawh result an nei thei lo. Jamaica in point khat a tawk tih hria in team tha an hmachhawn a, hneh taka an tlarhnung vengin an hlawhtling.

Goal inpe lova inhnehtawkin Brazil hmeichhiate hi kum 1995 hnua World Cup atanga an tlak hma ber tum an tawng.

Melbourne Rectangular Stadium-ah Brazil goal nawr a na a, tlarhmaah Ary Borges leh Luana ten goal an khung teuh a. Tamires goal khung tur Jamaica goalkeeper Becky Spencer chuan a dansak tha hle bawk.

An group inkhel lehlamah France tan Kadidiatou Diani chuan hattrick a siam a. Maëlle Lakrar, Léa Le Garrec leh Vicki Bècho ten goal dang khungin Panama 6-3 in an hneh a, group F-ah an sang ber a ni.