Incheina dangdai tak mai 21st century vela an uar tak `Boho Chic’ an tih mai, Hippies ho leh Bohemian hoin a inchei dan sukthlek an rawn tihdanglam, 2004-2005 velah phei chuan khawvel incheina zinga lar ber pawl, vawiin thlenga kan nula hoin a kan uar chhoh tak zel, filmstar lar Sienna Miller leh model chuai thei lo Kate Moss te inchei dan, khawvelina a entawn rawn chu kan uar chho leh dawn chauh niin alang.
Heng an incheina bikah chuan kan landan kha a natural thei ang ber ni thei se, a rawng lamah chuan lei leh thing leh mau rawng lam heng, serthlum rawng, a hring leh magenta (sen dâng) lam ni thei se a ṭha. Pawnfen leh kawr ni deuh hnilh hnelh lam ni thei se, a ziarang ni deuh bei buai kha a pawi miah lo, mahse kawr lian satliah (baggy) deuh ang chi ho kha a Boho hran lo, hak kher pawh a ngai chuang lo.
A bun lam chi chu tunlai kawrlum nena inmil tak tur sandals (flats) lam ho ni thei se, ke lang tam apiang a mawi, a nih loh vek chuan boots, tlema rawng sang, leather da deuh lam ni thei se, a tunlaiin a Boho khawp ang. Sam lam erawh a ngil pu duh tan ngil thla pawp ai chuan tlemin a sam tlang lam kha han herh kawi zeuh la, a nih loh vek chuan kir kawi chiat, phiar kir ang deuh te leh sei tak herh kawih kual te nen hetiang incheina hi chu a mawi bik. Ti Boho leh zual tur chein i sam chu thawl deuh hlekin han phiar la, han vet kual la emaw, pangpar sin deuh te han khim la, hnang tah lukhum parh nen i incheidan chu sawi ngai lovin a tam zawkin kan hrethiam tlang vek tawh ang.
A pawimawh ber kan lutdawn chiah. Heng `Boho looks’ kan tih mai boho inchei dan tikimtu, a behbawm heng ṭhi, ngun, zungbun ang ho hi heng zinga pawimawh ber pakhat a ni ngei ang le. Awmzia chu, bracelet tam tak bun deuh chuaih kha a pawi miah lo, ke bun an chi te, ṭhi chi hrang hrang a tawi fel, lian hraw pui aṭanga uai hneng hnuang thlengin, bengbeh uai fual tak te nen heng inchei dan tikimtu tak pakhat an ni. Hei mai a la tawk lo, lu hrenna, clip te leh a khum lam chi thlengin, kawnghren leh bag ah tur thlengin i inchei dan tilangsar thei tur ber i lo thlang dawn nia.
Hmai lam chei dan tur pawh natural deuha lang thei tur, hmai a tawk leka tisen (blusher) hmangin, hrisel hmel deuha i lan theih nan, mit pawh mascara tlem a zawng nen, make up tlem thei ang ber hman a ṭha. Mit chei nan pawh a dum ringawt kha a hneawm deuh takin a uk duk/buang lam hman a pawi miah lo. Hmui lam pawh lipgloss kan hmui rawng aia tak hret kha a tawk chiah, lipstick tak deuh te hman loh a ṭha, a vaia i incheina landan kha i tichhe vek thei. Khawlum chho ah phei chuan ṭhi leh bengbeh zawng zawng nen, lipstick tak tawk ila inbel zui phei chuan hmuh i hrehawm khawp ang.
Kan hriat hmaih miahloh tur chu khang ka sawi tak thi leh bengbeh,ngun ang chi ho ah kha chuan ram,thing leh mau ziarang,hnang tah ang chi te a tam thei ang ber hman tur,entirnan thinga siam ngun,tuikep atanga siam bengbeh leh thi te leh ramsa hmul a bikin sava hmul atang siam bengbeh ang chi te a mawi bik.Nasa lua a awmlo a ni deuh ber mai.
Thawmhnaw lampang pawh top bead/sequins works inchei nasa deuh hlek te, embroidery,leh par ziarang in print ang chi te, crochet lace, tunlai kan uar viau ziarang khat deuh pherhphurh ang chi te a boho riau ania. Kekawr tlawn tlang arh leh kekawr tlawn tan bulh te nen hakpui atan a ṭha khawp ang. Kawrfual lam erawh a fual hnilh hnelh kha a ṭha, thil in-print, par ziarang nei leh rawng lar vat mai lei rawng kara rawn inzep ang chi te kha a tunlai.
Eng ang pian, thau te, sin emaw ria sang tan pawh heng bohemian style te hi chu a inhmeh theih vek, i lo inchei chhin dawn nia, ilo inhmeh phian mai thei asin.