Hmeichhe boxing a undisputed featherweight boxing champion ni lai Amanda Serrano chuan a infiamna ngainat dangah kir leh a tum tih a tichiang a. Mixed martial arts a inel turin contract a ziak.
Kum 34 mi Serrano hian Professional Fighters League a Super Fight division a inel turin tunkar khan contract a ziak a. Rihna huang pasarih a boxing world champion ni thei hian MMA a inlan leh a tum hle.
PFL-ah hian engtikahnge a inlan dawn tih la puanzar a ni lova, a thlen nghal thuai pawh a rinawm rih lo.
Naktuk zingah hian Jake Paul leh Nate Diaz te inhmachhawnna tur event a undercard-ah a undisputed featherweight title hi Heather Hardy nen an inchuh dawn.
44-2-1 boxing record nei Serrano hian knockout in vawi 30 hnehna a chang tawh a. The Ring magazine chuan khawvela hmeichhe pound for pound fighter tha berah a dah mek.
Serrano hian February khan MMA-ah hian combat sport atang a chawlh hma in inel leh ngei a duh thu a lo sawi tawh a. Kum 2021 June kha a inlan hnuhnun ber niin iKON Fighting Federation hnuaia inelnaah Valentina Garcia chu a hneh a. MMA-ah hian 2-0-1 record a nei mek.
Boxer nimahsela Serrano hian MMA a hnehna a chan vawi hnih hi submission hmang ve ve in a ni a, mixed martial arts-ah hian flyweight leh strawweight-ah inelin boxing chauh ni lo a thiamna a chhawr hle.
MMA bakah no-gi submission grappling inelnaah vawi nga inlanin a chak ve bawk.
“Boxing avangin hriat ka hlawh a, mahse MMA leh Jiu-Jitsu hi ka ngaina hle a, training pawh ka nei nasa hle thin. Hengte thiamna te hian eng ang khingpui pawh hmachhawn ila min pui dawn tih ka hriat avangin ka inzir thin.” tiin a sawi.