Pakistan chhim lam rel chesualah mi 30 vel an thi a, mi 100 chuangin hliam an tuar bawk tih police thupuangtuin a sawi.
Hazara Express rel hi Nawabshah-a Sahara rel station bul lawkah chesualin a pindan eng emaw zat a let a. Chetsualna hi an khawpui lian ber, Karachi atanga km 275 chuanga hlaa thleng a ni.
Hliam tuarte hi a bul hnai damdawi in hrang hrangah dah an ni a. Chhanchhuah hna thawktute chuan pindan hrang hrang atanga tangte lak chhuah tumin an bei mek.
Army rescue team pawh pui turin koh an ni.
Railway Minister Saad Rafiq chuan an chhui thuak tawh chinah rel hi a chetsual lai hian a tlan chak thin dan pangngai angin a tlan tih an hre tawh tih a sawi a, a kawng a zawh sual chhan tak hi hriat an la tum mek zel tih a sawi.
Karachia railways thupuangtu chuan pindan pariat vel a kawng atangin a let chhuak niin a sawi.
Pindanah hian mi tang an la awm a, lak chhuah tuma beih mek a ni tih Geo chuan a puang.
Nawabshah leh a thenawm district-a damdawi inah te chuan emergency puan a ni.
Social media-a video tar lanah chuan chetsualna thlenna bul hnaiah hian mi tam tak an pung khawm a, passenger thenkhat chu pindan let atangin an vak chhuak lai a lang bawk.
Pakistan-a hian rel chetsualna thleng thin hi an tam hle a. Kum 2021 khan Sindh province-ah rel insuain mi 40 vel an thi a, eng emaw zat an hliam.
Kum 2013 leh 2019 inkar khan chetsualna thlengah hian mi 150 thi an awm niin tual chhung chanchinbute chuan an tar lang.