AIZAWL: Mizo Zirlai Pawl, General Headquarters, Aizawl leh Chin Baptist Church (CBC), Indianapolis, USA chuan Inrinni khan Saipum leh Saiphai-a Manipur atanga Zo hnahthlak raltlan awmte tanpuina sumfai, buhfai leh damdawi te an hlan.
Manipur atanga sa himna zawnga ral tlang Zo hnahthlakte hi Saipum-ah hian chhungkaw 60 (member 172) vel leh Saiphai-ah chhungkaw 15 (member 48) an awm mek a ni.
MZP leh CBC te hian Saipum-ah hian buhfai bag 16, Rs 5,000 leh damdawi chi hrang hrang Rs. 30,000 man hu pek an ni a. Saiphai-ah hian buhfai bag 8 leh Rs. 5,000 an hlan bakah, N. Chawnpui a raltlante tan buhfai bag khat leh Rs. 1,000 an hlan bawk.
MZP hruaitute chuan Manipur-a Zofate tawrhna chu pawi an tih thu leh MZP chuan engtik lai maha Zofa hmun hrang hrang a awm harsatna tawkte a ensan ngai dawn loh thu an sawi a. An tan MZP a awm reng thu leh a theih ang anga unaute tanpui tura a inpeih reng thu an sawi.
“Sem sem dam dam ti thin hnam kan nih avangin, in unauten kan ei chhung chu in nghei lo vang,” tiin thlamuang tak a awm turin an chah a. An tan mipui leh sorkarin theihtawp a chhuahna te hriatpui a, an mahni enkawltu khawtlang hruaitute nen a tha tak a thawkho zel tur leh khawtlang tan a harsatna siam lo turin an chah bawk.
MZP hruaitute hi MZP Kolasib hruaitute leh Govt. Kolasib College Student’s Union hruaitute’n an tawiawm a ni.