West Ham United chuan Manchester United atangin defender Harry Maguire leh Southampton midfielder James Ward-Prowse te chu Pound maktaduai 60 vela lalut turin inremna an nei.
Player pahnihte man hi Pound maktaduai 30 vel ve ve nia ngaih a ni a. Club te nen hian inbiakremna an nei tawh a, a inpek dan turah erawh an la indawr chhunzawm ang.
Kum 30 mi Maguire hian season liamta khan Old Trafford-ah starting XI-ah hmun a chang tam lova, tun season lo awm turah captain a nihna chu hlihsak a ni.
United a cham zui hi hnial lo mahse inkhelh tam a duh avangin Hammers a kal hi a hnial lova, ama lamah inbiakna engmah la nei lo mahse inremna neih an harsat lo tura ngaih a ni.
Kum 2019 khan Leicester City atangin khawvela defender manto ber ni turin Pound maktaduai 80 in United hi a zawm a, an tan vawi 175 a inkhel tawh.
Hammers hi tun nipuiah Ward-Prowse nen hian sawizawm an ni fo tawh a, nimahsela Southampton lamin lei dilna an dawn chu an hnawl leh thin.
Kum 28 mi an captain hi an chelh zel thei dawn lo nia a lan avangin Saints in Hammers lei dilna hi an pawm a, Carabao Cup first-round a Gillingham nen an inkhelah pawh an telh tawh lo.