Aizawl: Chief Minister Zoramthanga’n nimin khan West Phaileng-ah Community Service Centre thar leh Residential School Astro Turf thar hawngin, hripuiin Mizoram hi tuam lo phei se hmasawnna a hmu nasa dawn hle tih a chian thu a sawi.
Hawnna inkhawmah Zoramthanga chuan December, 2020-a Covid vanglaia lung phum a tak hawn theih a ni chu lawmawm a tih thu a sawi a. Hripui vang khan hun reilo te chhunga zawh hman pawh an inbeisei ngam loh laia reilo te chhungin tha taka zawh a lo ni ta si hi Pathian malsawmna a nih thu a sawi.
Hmun hrang hrangah hmasawnna thar hmuh tur a tam hle tih sawiin, “Hripui karah pawh heti khawpa nasa hian sorkarin hna a thawk a, hripui khan min tuam lo phei se chuan hmasawnna hi kan hmu nasa hle dawn tih hi a chiang a ni,” a ti.
Sports & Youth Services Secretary Dr Lalrozama kaihhruai hawnna inkhawmah hian khualzahawm Sports Minister Robert Romawia Royte leh bialtu MLA Lalrintluanga Sailo te pawhin thu an sawi.
West Phaileng Residential School sakna atan hian Pradhan Mantri Jan Vikas Karyakram (PMJVK) atangin kum 2019-20 khan Rs nuai 3,286.34 hmuh a ni a, he project ken tel nimina hawn tak artificial turf chu Rs. nuai 549.91 hmanga sak a ni. A lung hi Dec 15, 2020 khan chief minister hian a phum a, hnathawk turin M/s Decor, India, Gauhati chu thlan an ni.
March, 2021 khan thawk tanin July thla khan thawh zawh a ni a. Phullem phah chin zau zawng hi meter 100-a sei, meter 60-a zau a ni a, inkhelhna tur bik playground hi meter 95-a sei, meter 56-a zau a ni. A sirah Residential School Academic building te, Administrative building te, Principal Room, Hostel building dangte sak mek an ni bawk.
CSC hi PMJVK sum vek Rs. nuai 140 senga sak niin December 15, 2020 vek khan chief minister hian a lung a lo phum tawh a. Centre building hi a dung meter 15.70-a sei leh a vang meter 8.70-a zau a ni.