Union Home minister Amit Shah-a’n a koh angin August 9, 2023 chawhnu dar 2 khan ITLF hruaitute nen an inbia.
Hun rei tawk tak an inkawm a, tual chhung indona thleng mek dinhmun bakah mitthi vui loha la awmte vuina hmun turte an sawi.
Shah chuan mitthi vuina tur hmun chungchangah Meitei lamin sawiselna an neih avangin hmun dang ngaihtuah turin a ngen a. Mahse, ITLF hotute chuan mipui an rawn hnuah an thutlukna an hriattir tur thuin an chhang.
Shah chuan ITLF hruaitute hnenah rorelna hrang (separate administration) an ngen chungchangah political solution a awm theih hma chu inkah leh tharum thawhna chawlhsan turin a ngen a, chumi atan chuan sorkar laipuiin buffer zone-ah security tam zawk a tirh belh dawn tih a sawi.
Imphal khawpuia lehkha zirten an chhunzawm theih loh chungchangah Shah chuan hmun danga sawn an nih theihna tura hmalak a nih tur thu a sawi bawk.
Lamka leh Aizawl karah helicopter service bakah district hrang hrang inkalpawh dan tur ngaihtuah a ni ang tih a tiam a ni.
Imphal-a mitthi ruangte hi tute nge an nih hriat chian an nih theih nan hmalak a ni a, Lamka phurh thlen an nih theih nana hmalak a nih thu ITLF hruaitute a hrilh bawk.