Zanin dar 12:30 atangin Premier League season thar khelh a ni dawn a. Champion lai Manchester City in Burnley hmachhawnin league season bul an tan ang.

City hian season liamta kha duhthusam a tha a hmangin trophy pathum – League Cup, FA Cup leh Premier League te an la vek a. Kuminah a vawikhatna atana English football a league sang berah a zawna vawi li champion thei nih an tum.

“A thleng nawn thei lo”

Khawvela team tha ber niin mi tam takin an chhal a, an squad leh manager leh record thlirin a hnial theih loh. Mahse an manager Guardiola a tawng huai duh lova, an hnuhma ropui chu tluk leh a har dawn nia a ngaih thu a sawi.

“Season liamta kan hlawhtlinna kha chu damchhunga vawikhat bak thleng thei lo ang kha a ni, thlen nawn tir leh hi thil theih a ni lovang.”

“Kan hma a awm, tlang zingah pawh a sang ber chu kan lawnchhuak a, nimahsela tunhnai ni hnih chhungin tlang sangah kan lawm leh tawh lo. Bul kan tan tha leh dawn a ni.” tiin a sawi.

“Keini ang bawkin midang pawhin tum pakhat chiah an nei. Hlawhtlin tum ve vek an ni a, chuvangin kan hmaah hian tlang sang tam tak kan lawnchhuah ngai a tam dawn. Kan football khelh, kan inpekna leh ka rilru puthmang hi tun season hi thui takin a nghawng ang.” tiin a naute a fuih.

Inkhel lam

Kaithar team lakah Guardiola hian a defender thar Josko Gvardiol chu a inkhelh theih tur thu a sawi a. Ani bakah defender dang Nathan Ake pawh a dam hman tih a sawi.

Burnley in tun nipuiah team tihchak nan player an lalut nual a, heng zinga langsar Michael Obafemi erawh an chhawr thei dawn lova, inhliam avangin hun engemaw chen a chawl dawn.

Lak thar zingah Nathan Redmond, Jordan Beyer leh Dara O’Shea te erawh inkhel nge tura rin an ni.