Aizawl : Excise & Narcotics Department (END) in ni hnih chhungin hmun thumah heroin kg 3 leh gram 161 (hawng 256) an man.
Ningani khan END chuan Falkland vengah heroin gram 258 (hawng 22) leh a neitu nia puh mi pahnih – Lalthantluang (30), Khawmawi, Rih kawng, Myanmar leh Vanlalsawma (24), Zotlang, A-Section, Champhai, tuna Falkland venga khawsa mek nia inchhalte an man.
END hian hemi ni vek hian Assam Rifles (FIU) te phungbawmah sawmin, Tuikhurhlu (Edenthar)-ah heroin kg 1 leh gram 480 (hawng 121) leh he heroin tawlhruknaa inhnamhnawih nia puh mi pathum – Niengboi (33), New Lamka, Churachandpur, Manipur; Thlingneihhat (33), Lamka Manipur, (tuna Manipur ram buai vanga raltlan vanga Tuikhurhlu-a khawsa mek) leh Zoramnghak (47), Tuikhurhlu (Edenthar) nia inchhalte chu an man.
Heroin phurhna atana hman Santro Car, Regn. No. MZ01-V-0693 pawh hrensak an ni.
Zirtawpni khan END leh CADS thawkdun chuan Bawngkawn Brigade vengah heroin gram 109 (hawng 8) leh a neitu nia puh – Zosangpuii, Brigade Bawngkawn nia inchhal chu an man bawk.
Heroin phurhna atana hman Maruti Eeco Van, Regn. No. MZ01-K-3727 pawh hrensak a ni.
Zirtawpni vek khan Keifang khaw dai, Champhai Road-ah heroin kg 1 & gram 314 (hawng 105) leh a neitu nia puh mi panga – Monir Uddin (30), Sohalomara F.V. Hailakandi, Assam; Golam Wazid Bhaubhuiya (38) leh Mayazul Hoque Bharbhuiya (37), Cachar, Assam-a cheng ve ve; Barhan Uddin Tapahar (43) leh Salman Uddin Laskar (23), Dholai, Hailakandi, Assam-a cheng ve ve nia inchhalte an man.
Heng heroin te hi state pawna hralh tum mek lai a ni a, heroin phurh kualna atana hman Mahindra Bolero Regn No AS-11EC-5417 leh Maruti Swift car Regn No AS-11Z-4750 pawh hren sak nghal an ni.
Heroin vanga mante hi dan tlawhchhanin thubuai siamsak an ni.