Mizoram Lok Sabha member C Lalrosanga chuan parliament fur thutkhawm neih zawh taka sorkar rintawk lohna (no confidence motion) an thlawp chhan chu Manipur-a Zohnahthlak u leh naute chunga nasa taka tawrhna a thlen avanga tawrhpuina leh Manipur sorkar leh sorkar laipuiin he buainaa hma an lak tawk lohna avanga an duh khawp lohna lantirna leh an rintawk lohna avanga thlawp an nih thu a sawi.
Inrinni khan Mizoram Lok Sabha member C Lalrosanga leh Rajya Sabha MP K Vanlalvena ten parliament thutkhawm an neih zawh hnuah Mizoramah an haw a. Lengpui an thlen hlimah thu thar thehdarhtute zawhna chhang C Lalrosanga’n prime minister-in no confidence motion sawihona khaikhawmnaah Manipur chungchang a sawi tlai lutuk a, session tan tir atanga sawi tura an beisei a sawi lo mai ni lovin, a sawi ve chhunah a tawp lamah reilo te a sawi lang chauh kha an lungawi lo hle tih a sawi.
C Lalrosanga chuan session neih chhung zawng khan Manipur buaina chungchang sawi a tum chu NDA hotuten a tawp thlenga an rem tih loh thu sawiin, “Lok Sabha thutkhawmna lamah pawh Manipur chungchang sawi an awih miah lo a. Kei pawhin sawina hun remchang ka nei thei lo va. Session hma atangin sawi ka tum thu ka hrilh a. ‘Min phalsak tur a ni’ tiin adjournment motion pawh ka theh lut a. No confidence motion put luhah pawh sawi ka dil ve a. Mahse min phalsak ta chuang lo,” tiin, hmarchhak MP zingah Manipur chungchang sawi an phal loh thu leh Kiren Rijiju erawh chu Arunachal Pradesh mi a nih bakah minister a nih avanga a ni bak mi dang sawi awm a hriat loh thu a sawi.
Mizoram Lok Sabha member hian Manipur chungchanga mi dang sawi an phalsak ve loh chungchangah a bikin hmarchhaka NDA MP-te chu an lawm loh thu a sawiin, “Manipur chungchang sawi kha an au a, an ui a ni ber. No confidence motion chungchangah kan sawi ve thei anga tia kan lawm tawh tehlul nen, a sawi tur an rawn inruat tlat zel a. Chuvangin, nilenga ni thum chhung an sawi lai pawhin keini chu sawi ve min phal lo a, kan sawi ve thei ta lo a ni,” a ti.
Rajya Sabha member K Vanlalvena chuan union home ministry-in Supreme Court zawhna a chhannaah Manipur buaina chu Myanmar atanga Zohnahthlak lutte avanga chhuaka a puhna leh Manipur-a Zohnahthlakte chu foreigner ang deuha ngaih theiha union home minister-in a sawi chu a dik lohzia sawi a duh avanga house-a thusawi tura pen chhuak ta a nih thu a sawi.
Chairman a luh veleh a bul hnaia kala thusawina hun minute hnih tal pe tura a ngen thu sawiin, “‘Khalai kha thusawina hmun tur a ni lo,’ tiin ka thutnaah kal turin min ti a, ‘Ka thutnaa ka kal chuan thusawina hun min pe rawh,’ ka ti zel a. Ka thutnaa ka chhoh hnuah hun min pe ta mai si lo kha ka au ka au ta a. A tawpah hun min pe a, a phal loh Manipur chungchang ka sawi tak si avangin sound min off-sak a. Mahse, sawi turin ka inbuatsaih tawh a, ka au nasa hle. Ka thusawi hmun sariha thena hmun khat vel chauh a lo lang ta kha a ni,” a ti bawk.