Aizawl : Samagra Shiksha hnuaia Netaji Subhash Chandra Bose Awasiya Vidhyalaya (NSCBAV) Secondary Girls Hostel, Mamit ami chu Thawhtanni khan Mamit bialtu MLA Er. H. Lalzirliana’n a hawng.
Mamit bialtu MLA chuan Mamit District-in zirna kawnga hmasawnna hmel an hmuh theih nan bungthar an kai nia sawiin, lawmawm a tih thu a sawi a. Mamit district chu zirna kawngah an hnufual thin hle nia sawiin, aspirational district hiala thlan an nih thu a sawi.
“Heng hi a chhan chu zirna kawngah leh hriselna kawnga tehfung hrang hrangah kan nih tur kan phak loh vang a ni” bialtu MLA chuan a ti a. District mipuite chu an rilru, ngaihtuahna dik neia tumna sang tak nen district hmasawn tak ni zel tura tan an lak a tul thu a sawi.
Bialtu MLA chuan Girls hostel enkawltu tur mithiam tak tak mahni khawtual mi ngei an neih avanga lawmawm a tih thu pawh a sawi a. Nu leh pa ten an chungah rinna nasa tak an neih avangin theihtawp an chhuah a tul tur thu sawiin mahni mihringpuite chunga an duty tha taka hlenchhuah chu Pathian lawm zawng tak a nih avangin, naupangte entawn tlaka an nun hmang a, rawngbawlna rilru pu chunga naupangte en- kawl turin Mamit bialtu MLA H Lalzirliana chuan thawktute chu a chah bawk a ni.