Aizawl: Zoology department, MZU-a Development Biology & Herpetology Laboratory-a Prof HT Lalremsanga leh a thawhpui researcher ten Salamander species thar an hmu chhuak. He Salamander species hmuh chhuah tharte hi India rama a hmasa ber a ni.
Kum 2022 khan Prof. H.T. Lalremsanga leh thawhpui researcher te chuan Manipur a tlangsang tak leh ngaw kar a awm, Zaimeng lake leh hmun hrang hrangah expedition neiin, uchang leh chhawknghawl te nena huang khata awm Salamander te hi an pianhmang leh DNA chite zirchianna hna an nei tan a. He zirchianna atangin heng Salamander te hi species thar an ni tih hmuhchhuah niin, a hmingah an hmuhchhuahna dil, Zaimeng hmingchawiin Tylototriton zaimeng tiin anm phuah a ni.
Heti hian khawvel pumah Tylototriton salamander te hi species 40 ni ta in, India ramah chuan tun a salamander hmuhchhuah hmasakber T. zaimeng leh T. himalayanus an awm ta tihna a ni.
Salamander te hi uchang leh chhawknghawl te nen a animal class inang, Amphibian an ni a. Amphibia class hnuaiah hian order pathum – Anura: Uchang leh Utawk (7632 sp.); Caudata: Salamander (822 sp.) leh Gymnophiona: Chhawknghawl (221 sp.) te an ni..
Caudata te hi khawvel hmar lam, hmun vawt lam bawhin khawvel pumhualah Caudata hnuai a genus Tylotitriton hnuaiah hian salamander 39 species hmuhchhuah tawh niin, India ramah chuan kum 2015-a Nepal atanga hmuhchhuah Tylotitriton himalayanus (Bhutan, Darjeeling leh Nepal ah te an awm) chiah hriatchian ala ni a. Hetih lai hian, India hmarchhak state thenkhat Arunachal Pradesh, Manipur, Nagaland leh W.Bengal ah te salamander la hriatchian loh a awm tih hriat a ni bawk.
He salamander dangdai tak mai hi tlangsang a ngawpui tha tak kara dil leh tui awmnaah te hmuh thin a ni a. An khawsakna hi hmun biru leh hel tamna hmun te a nih avangin zirchianna ala awm hlei theilo a ni.