India ram chhung hmun dangte rualin nimin khan Mizoram district khawpui zawng zawngah India Independence Day vawi 77-na lawm a ni a. A lawmna pui ber, Aizawl Lammualah chuan khuallian, Chief Minister Zoramthanga’n zing dar 8 khan India hnam puanzar pawt pharhin parade contingent-te chibai a chhang let.
Chief minister chuan Mizoram mipuite leh khawvel hmun tinrenga India khua leh tuite duhsakna hlanin, zalenna boruak nuam tak hnuaiah India ram hmun dangte ang bawkin Mizoramin hmasawnna duhawm tak tak a hmu nasa tih a sawi a. Kumin phei chu India ramin G-20 Presidency a chelh kum a ni a, he mawhphurhna zahawm tak hi tha taka a hlen theih nan ram chhung hmun hrang hrangah inkhawmpui buatsaihin Mizoram pawhin G-20 Business – 20 Conference ropui tak March 2, 2023 khan a thleng a, ram 17 atangin palai an kalkhawm tih a sawi.
Kum li leh a chanve kalta chhung khan harsatna chi hrang hrangin ram chhung chim mah se, ram mipuite tanpuina leh thawhhona tha tak avangin harsatna tam takah hnehtu an ni thei tih sawiin, “Covid hripui vang khan kawng tinrengah harsatna tawk mah ila, ram mipuite hamthatna tur hmasawnna hmel duhawm tak tak nei turin sorkar chuan theihtawp chhuah a thulh ngai lo,” a ti.
Zoramthanga chuan vanduaithlak tak maiin kumin March thla tir atang khan thenawm state, Manipur-a buaina chhuak chu vawiin thlengin a la reh lo tih a sawi a. Buaina a chhuah rual khan Mizoram sorkarin a khua leh tui, a bik takin Imphal-a awmte chhanchhuahna hna a thawk nghal a, Imphal-a Mizoram mi tangkhang mi 264-te chu thlawhna hmanga thiar chhuah niin, hemi atan hian sorkar chuan Rs. nuai 36 chuang a seng niin a sawi.
July 18 thlenga chhinchhiah chinah Manipur atangin raltlan 12,509 an lut tawh a, relief camp hi Aizawlah leh district khawpui thenkhatah din niin heta awm mipuite tan hian buhfai 2,388.50 qtls pek tawh a ni a. Zohnahthlak unaute tanpui tur hian kohhran, tlawmngai pawl, thianho leh mi mal tam takten an thlawhhlawknaah an chungah lawmthu a sawi.
Mizoram sorkar pawhin raltlante chhawmdawl nan hian Rs. vaibelchhe 5 a ruahman tawh a, a bak mamawh dangte phuhruk nan sorkar laipuiah Rs. vaibelchhe 10 crore a dil mek thu a sawi bawk.
Chief minister chuan state chhungah hian tum hnih ngawt mai vawk hri – African Swine Fever (ASF) a leng tawh a. Vanduaithlak takin tunah hian a vawi thumna thleng leh thei dinhmunah a ding mek tih a sawi a. AH & Veterinary deptt. chuan he hri leng hmachhawn tur hian theihtawp a chhuah thu a sawi a. Kum 2021 khan ASF avanga vawk vulh lai 12,568 suat a ngaih tak avangin sorkar laipui atanmgin zangnadawmna Rs. nuai 1,169.94 hmuh a ni a, chhungkaw 2,488 hnenah sem a ni a. Kum 2022 a hri len tum hnihna avanga vawk 11,686 suat tak atan zangnadawmna Rs. nuai 526.633 chu sorkar laipuiah dilna theh luh a nih thu a sawi.
Khuallian hian Zoram mipui zawng zawng, a bik takin tlawmngai pawl hrang hrang leh kohhran mite chungah, kum li leh a chanve chhung zet an thlawpna tha tak a dawn avang te, an rintawkna lawmawm tak a hmuh avang leh kawng hrang hranga sorkar hmalaknaah te an phungbawmna an hmuh avangin lawmthu a sawi nawn leh a. Tun hnaia harsatna tawk, mangang leh tanpui ngaite tanpuina atana an inpekna leh an huaisennate chu ropui a tih thu a sawi a. Sorkar hnathawkte thawhrimna leh inpekna a chhuan thu sawiin; chanchinbumite leh Mizoram chhunga sorkar laipui pisa hrang hranga thawktu zawng zawngte chungah lawmthu a sawi bawk.
Boruak tha lo leh ralmuang lo hnuaiah ramin hma a sawn thei lo tih hre rengin remna leh muanna vawnghima harsatna awm apiangte inlungruala hmachhawna hneh zel tura rilru insiam thar chungin Mizoram tan theihtawp chhuah zel turin ram mipuite a sawm a ni.
Aizawla Independence Day lawmnaah hian sorkar hnathawk mi eng emaw zat hnenah hnathawh that vanga chawimawina hlan a ni a. Union Home Minster’s Medal for Excellence in Investigation, 2023 lawmman chu Lalnuntluanga, Sub Inspector, Lunglei Police Station hnenah khuallian hian a hlan.
Chawimawina
President’s Police Medal for Distinguised Service: R. Vanlalduata, MPS, Assistant CO, 1st Bn. MAP
Police Medal for Meritorious Service:
1) Lalhuliana Fanai, IPS, DIGP CID, Mizoram
2) H. Lalduata, MPS, Dy. SP, Security
3) R. Lalrumliana, ADM/Inspector, 2nd Bn MAP
Governor’s Gold Medal
1) Zothantluangi Chenhrang, Sub-Inspector, Commissionerate of Excise & narcotics, Aizawl
2) C. Ramnunmawii, Inspector, Lunglei, DEF
3) H. Vanlalthanga, Inspector, Champhai DEF
4) R.L.H Dingzela, Sub-Inspector, Security
5) Pradip Kumar barman, Havildar, PTS, Thenzawl
6) F. Zohmangaiha, Havildar, PTS, Thenzawl.
Governor’s Silver Medal
1) Sakhawthanga ralte, Constable, Assistant Commissioner of Excise & Narcotics, Aizawl
2) Lalrinliani, Constable, Commissionerate of Excise & Narcotics, Aizawl
3) Rozamliani Sailo, Sub-Inspector (M), MPRO
4) K. Lalmuanpuia, Sub-Inspector, Security.
5) H. Lalthlanfela, Asst. Sub-Inspector, CID (SB)
6) F. Lalchhuankima, Head Constable, Serchhip, DEF
7) Sahendra Paswan, Hon. Head Constable, Traffic
8) Rajesh Thapa, Havildar, 4th IR BN.
9) PC Lalthawhpuia, Constable, 4th IR Bn.
State Awards to Teachers, 2023
1) Lalnunhluna, Lecturer, Govt. Mizo Higher Secondary School, Aizawl, Aizawl District
2) F. Lalhmangaihthanga, Headmaster, Govt. High School, Lunglei, Lunglei District.
3) Lalthianghlima, Headmaster, Govt. Middle School-I, Dinthar, Aizawl District, Aizawl.
4) Lalengliana Chawnghlut, Headmaster, Govt. P/S-II, East Lungdar, Serchhip District.
Parade Lawmman dawngtute
1) Parade Commander: Rishi Kumar, IPS
2) Asst. parade Commander: Tikam Singh Verma, IPS
Armed Contingent –
1st Prize – 2nd AR
2nd Prize – 5th IR Bn
3rd Prize – 225 Bn. CRPF
Unarmed Contingent –
1st Prize – 1st BN MAP English Medium School Bharat Scout & Guide
2nd Prize – No 1 Platoon 1st Mizoram Bn. NCC
3rd Prize – No 1 Platoon 20 Mizoram Bn. NCC
School Contingent –
1st Prize – Government Mizo High School
2nd Prize – Government J.L Higher Secondary School
3rd Prize – St. Paul’s Higher Secondary School
Band Parties Participation Prizes–
1) 2 Assam Rifles Pipe Band
2) 1st Bn. MAP Brass Band
3) 3rd MAP Pipe Band