Mi tanpui hna thawktu pawl, Save the Children chuan Mozambique hmar lama Cabo province-ah Islalist helhovin naupang, thenkhat kum 11 mi lekte pawh an lu an tansak thin niin an sawi.
Nu pakhat chuan agency hnenah hian a fapa kum 12 mi lek chu hetiang hian an thahsak niin a sawi a, a fa dangte nen an birukna atangin an thlir a, an chhan ngam si lo niin a insawi.
Kum 2017-a Islamist helhi an hran hle hnu atang khan mi 2,500 chuang thi tawhin mi 7,00,000 chuangin hmun him panin an chenna an chhuahsan tawh.
Heng hel pawlte hi Islamic State (IS) firfiak pawl nena inzawmna nei an ni hlawm.
Boruakalhthei lama hausa tak province-a cheng, hetianga inthahna rawng tak tawngtu nia an sawite an kawmna atangin Save the Children hian report an siam.
Nu pakhat, Elsa inti chuan a fa dangte nena an birukna bul lawkah a fa upa ber chu a lu an tansak tih a sawi a. “Zanah kan khua rawn beiin kan inte min halsak,” a ti.
“Ka fate pali nen inah kan awm a. Thing hmuna tlan chhiat kan tum laiin ka fapa upa ber chu an man a, a lu an tansak a. Kan thih ve mai dawn si avangin engmah tihtheih kan nei si lo,” a ti.
Nu dang pakhat, Amelia-i pawhin a fate pathum nena tlanchhiat an tum laiin a fapa an kah hlumsak niin a sawi.
“Ka fapa kum 11 mi min thahsak hnuah chuan kan khua hi awm rengna atan a him tawh lo tih ka hre thiam tawh,” a ti.
“Khaw danga ka pate inah kan tlan lut a; mahse, a hnu lawkah min rawn bei leh tho,” a ti bawk.
Mozambique-a Save the Children director Chance Briggs chuan naupangten hetianga rawng taka tih an tawng hi hrehawm an ti hle tih a sawi.
“An camp-a nute an thil tawn an han hrilh chuan kan staff-te pawh an tap zawih zawih a ni,” a ti a. “He thahrum thawhna hi tihtawp a ngai a, hlauh leh thlabarna lak atangin chhungkaw tam tak chhanchhuah an ngai,” a ti bawk.
A hma pawhin Islamist helhovin khaw thenkhata mite lu an tansak tih hi sawi a lo awm tawh thin.