Brazil forward Neymar chuan Saudi Pro League side Al-Hilal chu French champion Paris Saint-Germain hnen atangin a zawm.
Kum 31 mi Barcelona star hlui manah hian Al-Hilal hian Euro maktaduai 90 vel an seng nia ngaih a ni a, a khelhdan a zir a pek belh tur a la awm.
Neymar chuan a team thar a zawm hnuah, “Europe-ah hlawhtlinna tam tak ka nei a, hun duhawm tak tak ka hmang. Mahse khawvel hmun hrang hranga inkhel thei player nih ka duh a, chona thar hmachhawn a infiah ka duh thin a, hmun tharah huntha inhawng hi ka la ta a ni.” tiin a sawi.
Neymar hi tun season-ah PSG coach Luis Enrique ruahmanna ah a tel ve lova, a club lamin a chhuah an phalsak.
Kum 2017 a khawvela manto ber ni tura Pound maktaduai 200 a Paris pantu hi Inrinni zana Lorient nen Ligue 1 a an inkhelh tum pawhin squad-ah telh a ni tawh lo.
PSG hian tun nipuiah an star player lakkhawmte chhuahtir a, team tha leh nghet din an tumna kawngah an forward langsar pathum te an chhuak vek dawn a ang ta hle. Lionel Messi-a’n Major League Soccer lam a pan hnuah Neymar a chhuak a, Kylian Mbappe hma hun a chiang lo mek bawk.
PSG tana vawi 173 inkhel a, trophy 13 la hman Neymar chuan, “Infiamnaah bungthar kai a, chhinchhiahtlak hnuhma neih ka duh. Tunah Saudi Pro League boruak a vung hle a, player tha rual an kalkhawm bawk.”
“An chanchin hi ka hre hnem a, tin, helai hmuna Brazilian tam tak lo inkhel tawh thinte hnung ka zui dawn a, ka tan chuan kal chakawmna tak a ni.” a ti a. Kum khatah Euro maktaduai 150 chuang a hlawh dawn niin an sawi.