Manchester United defender Harry Maguire hian West Ham United hnena kal tura club pahnihte an inrem hnuah a insawn leh dawn lova, first team-ah khelhna hmun chan tumin a bei zel dawn.
Kum 30 mi England defender hian Pound maktaduai 30 a club te an inrem hnuah Hammers a zawm dawn niin a lang hman a. Season liamta khan khelhna hmun a chan tlem bakah captain a nihna hlihsak a ni bawk.
Nimahsela United chuan an player in a duhna hi an zahsak dawn a, club atanga chhuah luihtir an tum lo tih an sawi.
Maguire-a lam hnai atanga thudarhah West Ham leh an manager David Moyes te ngaihvenna chu zahawm a tih viau laiin inremna an nei lo hrim hrim a. United-ah a nghet a, club a ngainat bakah inkhelhna hun a neih theih a inbeisei avangin cham a thlang tiin an sawi ve bawk.
Hmun thenkhatah West Ham hian Maguire hi tuna a contract neihlaia a hlawh zahve vel bak an pe thei dawn lova, hei vang hian Maguire hian United hnenah a contract a hlawh a hmuh theih tur chu pe tla turin a nawr a, club lam nen an inrem thei lo niin an sawi ve thung.