United States-a Georgia state-a inpawngkahna thlengah mi pariat an thi a, an zingah hian Asian an awm nual.
Police-te chuan inkahna hi Atlanta hmar lam dai, Acworth-a massage parlour leh Atlanta, khawpuia spa pahnihah a nih thu an sawi.
South Korea chuan thi zinga mi pali hi Korean thlah an nih ngei thu an sawi nghal.
Thuneitute chuan mipa kum 21 mi an man a, he tualthahna thlenga mawhphurtu ngei hi niin an ngai a. A tih chhan erawh hriat a la ni lo.
Hetianga a chet mai chhan hi hriat la ni lo mah se thuneitute chuan chi leh hnam inhuatna avanga che ni ngeia an ngaih thu an sawi.
Tun hnaiah hian Asian-American huatna hi US-ah hian a pung hle a, hei hi Covid-19 hripui leng tidarhtua ngaihna a awm vang a ni pakhat.
Kar hmasaa President Joe Biden-a thuchah sawi pawhin Asian-American huatna avanga beihna, tihnawmnah leh hmuhsitna ang chi a dem thu a sawi.
Inkahna thleng hriat hmasak ber hi Thawhlehni tlai dar 5:00 (India-ah nimin zing dar 2:30) velah niin Acworth, Cherokee County-a Young’s Asian Massage-ah a ni.
Sheriff pisa thupuangtu, Capt Jay Baker chuan a hmunah mi pahnih an thi a, mi dang pathum damdawi inah lak niin an zinga pahnih an thih belh leh tih a sawi a. Thite zinga pahnih hi Asian hmeichhia pahnih, mingo hmeichhia leh mipa an nih thu a sawi a. Hispanic mipain hliam na tak a tuar bawk tih a sawi.
Darkar khat pawh a la liam lo tihah Atlanta hmarchhak lama Gold Spa-ah inrawkna a thleng tih police-ten an hre leh.
“Officer-ten a hmun an thlen chuan a chhungah hmeichhe pathum, silaia kah hlum an lo awm,” tiin police chuan thuchhuah an siamah an tar lang.
Hemi hnu lawkah hian kawtthler piah lama Aromatherapy Spa-ah inkahna a thleng tih hriat leh a ni a. Hmeichhia pakhat a thi tih an sawi.
Police-ten Atlanta Journal-Constitution chanchinbu hnenah Atlanta khawpui bika kah hlumte hi Asian hmeichhia vek an nih thu an sawi.
Spa bul lawka CCTV thlalak atanga chhuitute chuan Robert Aaron Long, Woodstock, Georgia-a mi chu an ringhlel ber a, Atlanta atanga chhim lam km 150 vela hla, Crisp County-ah an man zui ta a ni.
Capt Baker chuan an mi man hi heng inkahna pathumah hian a titu ngei a nih a rinawm tak zet tih a sawi.
A kah hlumte hi tute nge an nih puan zar a la ni rih lo va. South Korea-a thuneitute chuan hmeichhe palite chu Korean thlah an ni ngei em tih finfiah an tum mek tih an sawi.