Palestinian helhovin rocket-a Israel chhim lam khawpui hrang hrang an kah hnuah nimin khan thlawhna hmangin Gaza Strip chu nasa takin a chhu zui leh.
Nimin tuk khaw var hmaa Gaza a kah lehna hi kar khat liam ta chhunga a beihnaah chuan tum khata a thawh nat ber a tling.
Israel chuan Hamas helho hmun hrang hrang leh an commander-te chenna in eng emaw zat an tichhia tih an sawi a; mahse, kawngpui leh power line-te pawh a chhe tel.
Nimin tuka an beihna avang hian mihring thi leh hliam erawh an awm hriat a la ni rih lo.
Gaza-a mipuite chuan an hlau tak zet tih an sawi a. “Thi turin ka inring reng a, thlamuang takin ka awm,” tiin Palestinian humanitarian worker, fa pahnih enkawl mek, Najla Shawa chuan BBC hnenah a sawi.
Kartawpa beih an tawh chungchang sawiin, “Kan hmelhriat tha tak takte pawh thah an ni a, thenkhat chu kan thawhpui, thalai leh kum upate pawh, mi pangngai ve mai maite an ni,” a ti.
Israeli sipaite chuan thlawhna 50 chuang hmangin khua a var fel rual chiahin minute 20 chhung Gaza Strip hi an kah thu an sawi.
Firfiakho hmun 35 an kap fuh a, Hamas leiverh km 15-a thui pawh an kap chhia tih an sawi bawk.
Hamas commander lawk tak tak chenna in pakua an kap fuh bawk niin an sawi a.Gaza ramri bula laipui nena an inchhawpna hmun an kap bawk tih an sawi.
Israel hian kar hmasa chhung khan an ram lamah rocket 3,000 chuang kah luh a nih thu an sawi.
Nimin khan rocket-a kah vanga inralrinna siren pawh Israel chhim lam hmun hrang hrangah tihrik a ni a. Rocket pakhat chuan Ashdod-a apartment building pakhat fuhin mi eng emaw zatin hliam an tuar.
Palestinian thuneitute chuan Pathianni zan zankhuaa Gaza-in beih a tawhah power line a chhia a, chenna in leh building za tel a chhia niin an sawi.
“Darkar thum kan mu a; mahse, taksa him lo taka khawsa kan ni a, zan hrehawm ber a ni,” tiin Twitter-ah mi pakhat chuan a tar lang.
Gaza-ah hian mi 198 an thi a, an zinga mi 58 chu naupang niin hmeichhia 34 an tel bawk a. Hliam tuar mi 1,230 an awm tawh bawk niin Hamas enkawl health ministry chuan a sawi.
Israel chuan hel pawl mi 130 chuang an thah tawh niin an insawi ve thung a, Hamas chuan an pawmpui lem lo.
Ram hrang hrangte chuan inkahhai puang turin na takin an nawr mek zel.
Egyptian President Abdul Fattah al-Sisi chuan inkahhai puan a nih theih nan hma a la dawn tih a sawi a, a thlen ngei pawh a ring tih a sawi.
UN Security Council pawh Pathianni zan khan thukhawmin Secretary-General António Guterres chuan indona a kal zel chuan nunauten an tuar nasa dawn tih a sawi.
Tharum thawhna thleng chu titawp nghal ve ve turin a ti.
Israeli-te hian nimin tuka an kah hma hian Palestinian-ten rocket hmangin Israel chhim lama Beersheba leh Ashkelon khawpui an kap.
Kar hmasa chhunga helhovin an kahnaah Israel-ah hian mi 10 an thi niin thuneitute chuan an sawi a, heng zinga pahnih chu naupang a ni a. Israeli thuneitute hian rocket-a beihna an tawh nasat ber tum a nih thu an sawi.
Iron Dome defence system an tih hmangin rocket kah 90% vel chu an kap thla tih an sawi a; mahse, car leh building eng emaw zat chu a chhe tho tih an sawi a, Ashkelon-a Yad Michael synagogue pawh a chhe tel.