Aizawl: Rs nuai 199 senga Sialhawka lakhuihthei sawngbawlna hmun sak tur lungphum chu nimin khan Deputy chief minister Tawnluia’n a phum.
Sialhawk Community Hall-a inkhawm tawi neihah Tawnluia chuan Sialhawk lakhuihthei za zela sawmthum tawih ral thin chu Processing Plant chuan a tih ziaawm theih ngei a beisei thu sawiin, processing Plant chuan kuthnathawktute tan lakhuihthei hralhchhuahna mai bakah, Sialhawk leh a chhehvel khua mipuite tan eizawnna thar chi hrang hrang – khawl enkawl, lakhuihthei phurh khawm, lei leh hralh bakah industry thil dang neuh neuh ah eizawnna tha zawk a siam ngei a beiseiawm tih a sawi a ni.
Mizoram Science Technology and Innovation Council (MISTIC)-a Chief Scientific Officer & Member Secretary Er. H. Lalsawmliana chuan Technical Report pein, he Processing Plant-ah hian lakhuihthei atangin juice, jam leh thildang siam chhuah a ni dawn a, Mizoram chhung leh pawn thlenga thawn chhuah tlak siam chhuah tum a nih thu a sawi.
Sialhawka Lakhuihthei sawngbawlna hmun tur hi Sustainable Development Goals pakuana – ‘Fostering Industry, Innovation, Infrastructure and Livelihood Oppurtunities at Sialhawk, Lungleng and Seling’ hnuaia hmalakna pakhat a ni a, he Plant atan hian Rs nuai 199 ruahman niin 225 square feet a zau tur a ni.
He huna an tarlan danin, Sialhawk khua hian nikkum fur chhung khan lakhuihthei quintal 14,000 an tharchhuak a, thal laiin fur laia an thar hmun ngaa thena hmun khat an thar chhuak thung.