Aizawl: Kumin MLA inthlanpui lo awm turah political party hrang hrangin assembly constituency 40 awmah an candidate tur an tifel tan mek a. Indian National Congress (INC) aiawha candidate tur pawh eng emaw zat a hriat tan.
INC hian MLA panga an nei mekin, Thorang bialtu MLA Zodintluanga Ralte, Lawngtlai West bialtu Ngunlianchunga, West Tuipui bialtu Nihar Kanti Chakma leh Hachhek bialtu Lalrindika Ralte te chu an bial ngaia ding leh tura ngaih an ni a. Palak biala an MLA KT Rokhaw erawh Congress ticket-in a ding nawn dawn em tih erawh hriat theih a la ni lo.
Anni bakah hian MPCC President Lalsawtaân kumin MLA inthlanpui lo awm tura an party aiawh ding turin Serchhipah R Vanlaltluanga leh Siaha bialah N Chakhai te an nih tur thu a lo puang chiang tawh bawk.
Hrangturzo bialtu MLA lo ni tawh, tuna Mahila President ni mek, Lalawmpuii Chawngthu chu Kolasib biala ding tura ngaih a ni a. Ani hian he bialah ticket a chana Lunglei South-ah Meriam L Hrangchal a ding a nih bawk chuan tun tum MLA inthlan lo awm turah Congress party-in hmeichhe candidate pahnih an nei dawn tihna a ni.
Congress party aiawha candidate tur hming langsar an sawi zingah Dampa bialah Lalhmingthanga Sailo, Serluiah Anggu Lalhmachhuana, Chalfilh-ah Vanneihthanga Vanchhawng, Aizawl North I-ah Lalnunmawia Chuaungo, Aizawl North II-ah R Lalrinmawia, Aizawl North III-ah MPCC Vice President Lal Thanzara, Aizawl South II-ah MPCC Treasurer Dr Lalmalsawma Nghaka, Aizawl West I-ah party thupuangtu Dr Lallianchhunga, Lengteng bialah Lalhmingthanga Pachuau, South Tuipuiah Dintluanga, Lunglei North-ah Eric F Zomuanpuia te an tel.
Anni bakah hian Congress MLA hlui lo ni tawh, Joseph Lalhimpuia chu Lunglei East-ah ding tura ngaih a ni a, Lunglei West-ah PC Lalthanliana leh Lawngtlai East-ah H Zothangliana te bakah Tuivawl bialah RL Pianmawia te an ding leh dawn nia hriat a ni bawk.
Hetih lai hian MPCC President Lalsawta erawh a dinna bial tur hriat chian a la ni lo thung.
Nimin khan Mizoram Pradesh Congress Committee (MPCC) Election Committee (Nomination Committee) chu an chairman Lalsawta kaihhruaina hnuaiah Aijal Club-ah an thukhawm a. Kumin MLA inthlan lo awm tura party candidate tur chungchang sawi ho tura ngaih a ni a. An thurel a zirin candidate tura ngaihte pawh a danglam leh thei a ni.