Mizoram sorkara hnathawkte chuan sorkar notification ding lai anga dearness allowance (DA) rate hman phut nan nimin atangin an hnathawhna hmunah badge dum an bel tan.
Tar lan tawh thin angin, sorkar hnathawk pawl hrang hrang intelkhawmna, Federation of Mizoram Government Employee & Workers Executive Committee August 11-a thukhawm chuan sorkar notification ding lai anga sorkarin DA rate a hmantir duh lo chu pawi tiin, hemi chungchang sawipui tura chief minister an ngennain awmzia a neih loh avangin lungawi lohna lantir nan August 17 leh 18 chhungin badge dum bel an rel.
Sorkar hnathawkte hian nimin atang khan badge dum hi an bel tan a, vawiinah an chhunzawm leh dawn a, lungawi lohna an lantir hian awmzia a nei lo a nih chuan hmalak zel dan tur tur chu August 22-ah FMGE&W General Council Meeting-in a ngaihtuah leh dawn a ni.
FMGE&W hruaitute chuan an hriat theih chinah sorkar hnathawkten badge dum an bel tha hle tih an sawi a. Lungawi lohna an lantir tan niah sorkar hotute atangin dawrna an dawng lo tih an sawi bawk.