‘Treble champion’ an ni a, khawvela football team tha berah mi tam takin an chhal. An manager berin bul tan thar tha leh an ni angin sawi mahse Manchester City in an zia an thlah lo, UEFA Super Cup-ah Sevilla lakah penalty shootout-ah an chak.

Nilaini zanah Athens a Georgios Karaiskakis Stadium a inkhelah hun pangngai a 1-1 a an inhnehtawk hnuah penalty pet a ni a. Penalty atangin a pet apiangin an khung vek laiin Nemanja Gudelj chuan goal ban a pet per a. 5-4 in Manchester City an chak ta zawk.

City an tlo

Europa League champion lai lakah Manchester City hi chak tura rin an ni zawk. Nimahsela bneisei angin bul an tan lo.

An midfielder rinrawl Kevin de Bruyne hliam avangin an insiksawi a ngai a, nidang anga han khelh mai an harsat.

Spanish team in remchang an hmuh an hmang tangkai. Minute 25-naah ball kang a hlauhawm thin striker Youssef En-Nesyri chuan tauh lutin hma an hruai.

Sevilla goalkeeper Bono leh Manchester City lama a tlukpui Ederson te an rim a, an che tha bawk. An team goal chhuah tur vawi engemaw zat an dang a, chu mai bakah tlarhnungah hlauhawm thlen theihna tur ang lo veng hman zelin an nghet.

Manchester City tan KdB inhliam vanga inkhel Cole Palmer chuan first team ah hmun nghet chang turin theihna a nei tih a lantir a. Man of the match a thlan phu taka khelin minute 63-naah Rodri ball cross chu a tauh lut.

Inkhel tawp lamah chak tumin an innawr ve ve a, amaherawhchu goal a luh belh lo.

City boss Guardiola hian an tana goal pawimawh khungtu Palmer fakin, “A kheltha tak zet a, a goal khung kha goal tha tak a ni. Chhuah duhna rilru a pu ni khan ka hre thin a, mahse tunah hian a rilru ka hre lo. A chhuak a nih loh chuan first team-ah a awm ang, loan in hmun dangah a kal lovang.” a ti.

City an kal zel

Community Shield-ah penalty shootout ah tho an tlawm tawh a, manager Guardiola chu an Super Cup an lak avangin a lawm.

Super Cup hi Barcelona leh Bayern Munich-ah te a la tawh bawk a, club pathum atanga la thei manager hmasa ber a ni.

He hnehna chang turin Spanish team, cup inkhela tlo thin tak an hneh. Tun nipuiah player insiksawi nual an nih bawk avangin City hi an elpuite zawng zawng tan um tak meuh an la ngai dawn tih an lantir.

“Tun dinhmunah kan that dan berin kan khel lo tih chu a sawi theih. Mahse ka player-te ka hria a, ka coach te ka hria a, theihtawp kan chhuah leh dawn. Tun season-ah title pakhat lak tawh hi kan lawm a, tunah chuan a bak la awm zawng lak tum a ni tawh.” a ti.