China chuan an rama nau piang an tam theih nan nupa tuak khatin fa pathum zel neih phalna chu dan angin an pawm ta.
An rama dan siamtu sang ber, National People’s Congress (NPC) thukhawm chuan Zirtawpni khan dan thar hi an pawm ta a ni.
China hian mihring pung chak lutuk tur ven nana an dan kalpui mek chu May thla daih tawhah khan thlakin nupain fa pathum zel neih theih tur hi an lo puang tawh.
Puan a nih hnuah hian dan ang taka pawm mai a ni lo va, tunah erawh pawm a ni ta a. Hei hi nau piang tihpunna tura an ruahman niin Xinhua news agency chuan a sawi.
Dan thar pawm takah hian danin a phal chin aia tam fa neite hlawh lak thensak thin chu paih a ni a. Tual chhung sorkarte chu an hnathawkte zingah nau neih chawlh lak phalna zau zawk siamtir te, hmeichhiate hna thawhtir phalna zau zawkte leh naupang enkawlna lam tihchangtlunna turte a tel.
Tun hnaia China chhiarpuiah hian nau piang an tlem tak zet tih hmuh a ni.
Kum 2016 khan China hian nupain fa pakhat chauh neih an kalpui chu titawpin pahnih neih phal tiin an dan an siam tha a. Hei pawh hi nau piang tlem lutuk tihziaawmna tur tho a ni a, tunah pathumah an tipung leh ta a ni.
China-ah hian naupang enkawlna man a sang lutuk chu nupain fa an neih tam ngam loh phah bawk.