Chhattisgarh-a Narayanpur district-ah Zirtawpni khan Maoist hel pawlin an beihnaah Indo-Tibetan Border Police (ITBP) pahnih an thi a, pakhat hi Assistant Commandant a ni.
Bastar range-a Inspector General of Police Sundarraj P chuan beihna hi chhun lai vela thleng a nih thu a sawi a. ITBP 45th battalion-te chu helai vela duty-a an chhuah laiin a thleng niin a sawi.
45th battalion thuthmun, Kademata camp atanga metre 600 chuang hret chauhva hla a ni a, Maoist helho hian an kap niin Sundarraj chuan a sawi.
Maharashtra-a Nanded district-a mi, Assistant Commandant Sudhakar Shinde leh Assistant Sub-Inspector Gurmukh Singh, Punjab-a Raikot district-a mite an thi tih a sawi.
Sundarraj chuan Maoist-te hian AK-47 rifle, bulletproof jacket pahnih leh wireless set an la tih a sawi bawk.
Inspector General chuan sipai dang tirh nghal an nih thu a sawi a, ITBP sipai ruang pahnih pawh an hlawm tawh tih a sawi bawk.
Narayanpur, Rajnandgaon leh Kondagaon te hi Chhattisgarh-a district pathum zinga Maoist laka beihpui thlak turin ITBP dahna an ni a.Battalion pariat an awm mek a ni.
Bastar division an tih hi Bastar, Dantewada, Bijapur, Narayanpur, Sukma, Kondagaon leh Kanker district huam a ni a, sorkarin pawhin Maoist helho laka beihpui a thlak nasatna lai ber a ni.
Kumin kum tir lam, April 4 khan venhim hna thawktu mi 22 chu Maoist-ho hian Sukma-Bijapur ramri-ah lambunin an lo that tawh.