Aizawl : Tun hnaia ruahsurin Aizawl Cluster huamchhung Sateek Wholesale market leh Guest House inkawp building bulthuta leimin thlengin harsatna a thlente chu Inrinni zing khan Rural Development Minister Lalruatkima’n a enfiah.
RD Minister Lalruatkima chuan Sateek SPMRM Wholesale Market building chhan him a nih theihna turin department thawktute leh khawtlang hruaitute’n tan an lak tlan a tul thu a sawi a. Tun dinhmunah building himna tura tulte ngaihven thuai chu ngaih pawimawh hmasak a nih thu leh fur zawh veleh hmalakna dangte pawh kalpui tum a nih thu a sawi.
Lalruatkima chuan India rama Shyama Prasad Mukherji Rurban Mission (SPMRM) Cluster 300 awm zingah Aibawk Cluster chu an huamchhunga hmalaknate zo hmasa ber a nih thu leh sorkar laipui pawhin chhuanawm a tih thu a sawi a. Sorkar chu mipuite ta a nih angin hmasawnna ruhrel din leh bungruate chu mipui ta a ni, tiin, khawtlang mipuite chu neitu thinlung pua enkawl chhunzawm zel turin a chah.
He hunah hian tun hnai ruahsur avanga leiminin Sateek SPMRM Wholesale Market building dinhmun a tih derthawn chu shhiatna nasa zawk a thlen loh nana hmalak nghal tulte sawiho niin, tui chhe paihna siam danglam, tuiput lo tura siam leh building leh a chhehvel tuihul taka siam chu hmalak hmasak tul a nih thu tarlan a ni a. Mipuite him zawk nan tun ruahtui tlak hun chhung hun eng emaw chen chu luah rih lova dah leh a himna tur lam hawi hna thawh ni se tih a ni a. Ngun taka vil chhunzawma chanchin ngaihven zui zel ni se tih a ni bawk.
Sateek Wholesale Market-cum-Guest House hi SPMRM sum cheng nuai 350 senga sak niin, October 14, 2022 khan hawn a ni.