Ultimate Fighting Championship a bantamweight fighter ngaihven hlawh Sean O’Malley chuan a tum ram a thleng a. UFC champion ni turin Aljamain Sterling chu round hnihnaah technical knockout in a hneh a. Champion thar a ni.
Boston a TD Garden-ah Pathianni zingah UFC 292 hi neih a ni a. O’Malley hian round hnihna tan hnu lawkah a khingpui hi a kut dinglam a hnek fuhin chhuatah Sterling a tlu a. Kutthlak chhunzawmin a khawih fuh leh nual hnuah a chak.
Kum 28 mi O’Malley hian kum 2017 khan Dana White’s Contender Series 2 leh The Ultimate Fighter-ah te a chak hnuah UFC contract pek a ni a. Vawi 10 inlan tawhin heng zinga vawi 8 hi a chak a. Performance of the Night vawi li a dawng tawh a, fighter hmuhnawm a ni.
A chak hnuah, “Cage ka luh dawna ka la zam ber tum a ni ang. Ka hmuh danah chuan Aljamain Sterling hi bantamweight awm tawh zinga tha ber a ni a. Mahse ka kut dinglam hi ka hrechiang a, ka inrintawkna ka hloh miah lo.” tiin a sawi.
O’Malley hian kum 2020 a a hneh loh Marlon Vera chu inhmachhawn leh turin a cho zui nghal bawk.
Sterling chuan, “Ka tlawm tawh thin a, knockout pawh ka ni tawh thin. Ka tho leh a, UFC champion ka ni tawh. Ka lo kir leh hunah thil mak a ni dawn lo.” tiin a sawi ve thung.
Co-main event-ah hmeichhe strawweight champion Zhang Weili chuan a chungnunzia lantirin Amanda Lemos a thunun tluan a, unanimous decision in chiang takin a chak.
24-3 record nei Zhang hian hi strawweight title fight-ah vawi li a chakna niin UFC legend Joanna Jedrzejczyk record siam chu hnehna vawi hnih chiahin a pha lo mek.