- Ruata
India chu a khawvela car crash safety programme nei ram 5-na a ni ta a. Union Minister of Road Transport and Highways, Nitin Gadkari chuan Bharat New Car Assessment Programme (Bharat NCAP) chu a hawng a. Tunah chuan Bharat NCAP thar hian ASEAN NCAP, Latin NCAP, Euro NCAP leh ANCAP league a zawm ta. October 1, 2023 atanga hman tan tur Bharat NCAP thar hian ram chhunga kawngpui himna tihchangtlunna kawngah nasa takin a pui dawn a ni.
Kawngpui chetsualna leh a kaihhnawih mihring thihna lamah India ram chu hmahruaitu ram thenkhat zingah a tel mek a. Bharat NCAP program thar hian lirthei leitute chu an lirthei lei turah duhthlanna dik siam turin a pui dawn a, lirthei siamtute chu lirthei him zawk siam turin a hruai dawn bawk a ni. India ramchhunga lirthei siam zawng zawng bakah import car, a rihzawnga ton 3.5 thleng nei te pawhin Bharat NCAP norms thar an zawm a ngai dawn a. Petrol leh diesel lirthei chauh ni lovin, BNCAP hian CNG leh electric lirthei te pawh a enfiah vek dawn a ni.
Minister Nitin Gadkari chuan India rama lirthei siamtu hrang hrangte chuan Bharat NCAP safety ratings hnuaia enfiah atan car model 30 chuang an pe tawh tih a sawi a. Lirthei siamtute chuan Automotive Standards 197-in a tarlan angin an lirthei chu an duhthusamin crash testing atan an pe thei a, lirthei company te chuan Bharat NCAP hnuaia test neihna tur lirthei model chu sorkar laipuiin a ruat agency-ah Form 70-A-a dilna thehluh hmangin an nominate thei dawn a ni.
Bharat NCAP hotute chuan testing centre-ah hian lirthei te chu OEM leh Bharat NCAP pahnih aiawh te awmnaah crash test an nei ang a. Eng lirthei model-ah pawh a man tlawm ber leh variant hniam ber, base variant chauh BNCAP hian crash test a nei dawn a. Global NCAP ang bawkin Bharat NCAP hian category pathum – Adult Occupant Protection (AOP), Child Occupant Protection (COP) leh Safety Assist Technologies (SAT)-ah lirthei himna enfiahin star based rating 1 aṭanga 5 thleng a pe dawn a. BNCAP standing committee hnen atanga phalna an hmuh hnuah crash test result hi a hlawma dah a ni ang a, OEM te hnenah an pechhuak leh dawn a. Central Institute of Road Transport (CIRT)-in certificate a pe bawk ang. Lirthei crash test rating hi agency-in a ruat portal-ah tarlan a ni ang.
M1 category hnuaia lirthei, mi pariat ṭhutna bakah driver te chu Bharat NCAP hnuaiah crash testing neih theih a ni ang. Heng test-ah hian lirthei kg 3,500 thleng rit te chu an tel thei dawn a ni. Test te hi base-spec model-ah neih a ni ang a, calendar kum hmasa khan unit 30,000 zet hralh chhuah a ni ang. Lirthei hi update thar a nih chuan OEM pawhin retest a dil thei bawk. Car-te chu hmun 3 – Adult Occupant Protection (AOP), Child Occupant Protection (COP) leh Safety Assist Technologies (AST) ah te enfiah a ni ang. Bharat NCAP chuan AOP & COP tan offset deformable barrier frontal impact test, side impact test leh pole side impact test te a nei dawn a. Heng bakah hian thil pawimawh hrang hrang a awm bawk a ni.