Pakistan-a Balochistan province khawpui, Quetta-a khualbuk changkang taka bomb puakah mi panga an thi a, mi dang 12-in hliam an tuar bawk.
Pakistani Taliban chuan Nilaini zana Serena Hotel-a lirthei hunna hmuna car an dah hmanga bomb puak hi an tihah an chhal nghal a. Police officer leh hotu dangte an tum tih an sawi bawk.
Taliban thupuangtu chuan thihchilha chetna a nih thu an sawi a, car-a bomb phurh khat tlat tihpuah a nih thu a sawi bawk.
An tum ber chu China ram palai nia hriat a ni bawk.
Ambassador Nong Rong hi Quetta khawpuiah hian a awm a; mahse, beih a nih lai tak hian khualbuk chhungah hian a awm lo thung.
Pakistani Taliban erawh chuan Chinese palai beih an tum tih an thuchhuahah an sawi lang ve lo thung.
Serena Hotel lirthei dahnaa car hun atanga bomb a puah hian a kang chuan a bula lirthei pawh a kang chhe nasa hle.
Thi zingah hian venhim hna thawktu pahnih an tel a. Tual chhung chanchinbute chuan khualbuka thlengte chu an him vek niin an sawi.
Nimin khan Chinese foreign ministry thupuangtu, Wang Wenbin chuan bomb tihpuah an dem thu leh pawisawilo an thi chu pawi an tih thu a sawi.
An ram aiawh tumah thi leh hliam an awm loh thu a sawi bawk niin Reuters news agency chuan a tar lang.
Pakistan-a Chinese embassy chuan China-a Global Times hnenah an thawktute an him thu an hrilh bawk.
Balochistan province-a an Home Minister Ziaullah Lango pawhin Nong-a pawh a him thu leh Quetta a tlawh hun hi nimin khan a zawh thu a sawi.