UN-in hetianga a puhna chungchangah hian Taliban thupuangtu, Suhail Shaheen chuan an puhna chu ‘politics thil vang mai mai’ niin a sawi ve thung.
“UN leh mi dang pawhin min puhna hi heng mite hi mi mal phuba lakna emaw, mi mal thubuai bik emaw chungchang vanga an tih a ni tih miin an hriatpui lo,” tiin Shaheen-a hian Qatar khawpui, Doha-ah a sawi.
Afghan tu pawh, dan bawhchhia chu dan tlawhchhan zela hrem an ni tih a sawi bawk.
Taliban thupuangtu hian sipai hlui emaw, sorkar hnathawk thin emaw pawh, ‘tun hmaa an hnuhma avanga hrem’ an ni lo niin a sawi.
“Sorkar policy chu a chiang a, sorkar hmasaa lo tel tawh zawng zawngte an zavaia ngaihdam hi a ni,” tiin Al Jazeera pawhin a sawi.
A hmain Afghan foreign ministry pawhin UN report hi a dik tawk lo tih a lo sawi ve tawh bawk.
“Islamic Emirate hian chungthu rel hmasak lohva mi thah, mi man ngawt, mi hren, sawisak leh mihring dikna chanvo palzutna ang chi zawng zawng chu sorkar hmasaa lo thawk leh venhim hna thawktute laka tihna engmah a awm lo,” tiin a puang niin Associated Press chuan a sawi.
United States leh NATO sipaite kum 20 an awm hnua an chhuah rual khan Taliban hian Afghanistan-ah thuneihna an chang zui a. US-in a zirtir chhuah Afghan sipaiten an dang zo lo va, Afghan leh ram dang mi sang tam takin Kabul thlawhna tumhmun panin an ram chhuahsan tumin an inhawr khawm nasa hle nghe nghe.
Ro an rel hmasak, kum 1996 leh 2001 inkar aia nem zawka rorel intiam an ni a; mahse, Taliban hian dan khauh tak tak an siam zui a, Islamic dan hmangin hmeichhiate chu pawl ruk aia sang zir an phal lo va, vantlangah an chhuahvah theihna tam tak khuahkhirhin hna an thawh pawh an phalsak mumal meuh lo.
Ram dang, Muslim ramah chuan hmeichhiate zir leh hna thawh hi khap a ni ngai meuh lo va. Muslim mi thiam leh an hruaitute pawhin Islam hian lehkha zir leh hmeichhiate hna thawh a phal niin an sawi bawk.