Aizawl : Kum 2008-a Lumpsum Aided-a dah Higher Secondary School pakua, Mizoram Govt. Lumpsum Aided Higher Secondary School Association (MIGLAHSSA) chuan an sikul te sorkarin Adhoc Grant-in-Aid-a hlan beiseiin August 28, 2023 khian lehkha zir lova sorkar thu ngaichang chungin sikul kal an tum.
Nimina thuchhuah an siamah MUGLAHSSA chuan, kum 2018 MLA inthlan dawna tuna Chief Minister leh Cabinet Minister thenkhat ten kum rei tak khawtlangin an lo hahpui tawh, an sikul-te Adhoc Grant-in-Aid-a hlang kai tura an lo tiam tawh vawiin thlenga tihhlawhtlina la awm lo hi lungchhiatthlak an tih thu an sawi.
MIGLAHSSA chuan an intiamna ang ngeiin, Adhoc Grant-in-Aid-a hlan ngei beiseiin August 28 (Thawhtanni)-ah lehkha zir lovin sorkar thu ngaichanga sikul kal an tum thu leh, sorkar atanga thu lawmawm an hmu lo a nih chuan school kharin sorkar thu an ngaichang chhunzawm an tum a ni.
“Kum 20 chhung zet VC, khawtlang mipui, zirlai nu leh pa leh thawktuten an lo hahpui tawh zirnain te hian beiseina sang tak nen sorkar kan thlir a. Zirna ngaipawimawhtu kan sorkar hian khawtlang phurrit kan zirna inte hi rei lo teah Adhoc-Grant-in-Aid hmanga min phurh chhawk ang tih kan beisei tlat a ni,” an ti.
MIGLAHSSA hnuaiah hian Higher Secondary School pakua – Thingsulthliah HSS, Farkawn HSS, Zobawk HSS, Zawlnuam HSS, West Phailenh HSS, E. Lungdar HSS, NE Khawdungsei HSS, Phullen HSS leh Tuisualral HSS te an awm.