West Ham United chuan German club Stuttgart atangin Greece defender Konstantinos Mavropanos chu an lalut fel.
Kum 25 mi hian Hammers hnenah hian kum nga contract a ziak a, an tan jersey number 15 a ha ang. Hammers in an leina man zat hi puanzar ni lo mahse Pound maktaduai 19 vel niin an sawi.
Mavropanos hi English football-ah a mikhual lova, kum 2018 January khan Arsenal zawmin an tan Premier League match sarih a khel hman a, hemi hnuah hian loan in Germany lamah a inkhel.
“Ka football zinkawngah bung thar a ni a, ka phur tawh tak zet. He kawr ha chung hian theihtawp ka chhuah ang.”
“He club ka zawm hi lawm a, Premier League a ka inkhel leh tur hian min ti phur hle.” tiin Mavropanos chuan a sawi.
Greece tana vawi 19 inkhel tawhin tun nipuiah West Ham in player an lakluh pathumna a ni a, midfielder James Ward-Prowse leh Edson Alvarez te hnung a zui.
Stuttgart hi Arsenal atangin loan in season hnih chhung a zawm hnuah season liamta khan a nghetin a zawm a. An tan vawi 89 inkhel tawhin goal riat a khung tawh.
Hammers hian tun nipuiah centre-half thar lakluh an duh avangin an dap kual nasa a, Manchester United defender Harry Maguire lei turin inrem tawh mahse player nen an inrem thei lo.