Manchester United midfielder Mason Mount chuan inhliam avangin Premier League a match hnih an khelh leh tur a khel ve thei dawn lo.
Red Devils hian an midfielder hi thla thar a international break awm hun vel thleng a chawlh a ngai dawn niin an sawi a, tun kartawpa Tottenham nen an inkhelh tumin a inhliam tih an sawi.
Mount hian June thla khan Chelsea atangin Manchester United hi Pound maktaduai 55 in a zawm. A team United hian Inrinni hian Nottingham Forest an mikhual dawn a, September 3 hian Arsenal khelmualah an inlan ve thung ang.
Kum 24 mi England international hian September 9 a Euro 2024 qualifier a Ukraine leh England inkhelh hunah ram tan a inkhel ve thei ang em tih a chiang lo bawk.
Club lamah United in Premier League match hnih an khelh tawhah Mount hian bul a la tan ve ve a, nimahsela Erik ten Hag-a midfield ah beisei angin a la khel lo niin fans tam takin an ngai.
Wolverhampton Wanderers nen an inkhelh tumin minute 68-naah lakchhuah a ni a, Christian Eriksen-a’n a thlak hnuah United in ball awmze nei an inpe tam zawk.
Tottenham lakah huntawp dawn lamah lakchhuah nimahse Spurs midfielder te second half-ah an khan lo thin hle.
Hetihlai hian United hi tun nipui player bazar khar a nih hma in player thar lakluh belh tura ngaih an la ni a. Fiorentina midfielder Sofyan Amrabat leh Nice defender Jean-Clair Todibo bakah forward thar an la duh niin an sawi.
Amrabat hi La Viola in tun season a European football khel tur squad-ah ziak lut mahse zanin a Europa Conference League play-off first leg khel tur zingah an telh lova, hei vang hian a hma hun a chiang lo niin thenkhatin an ngai.
Morocco midfielder hi a hma hun tichiang turin darkar 72 an pe a, United bakah Liverpool leh Atletico Madrid te pawhin lakluh an duh niin thu a thang bawk.