Transport Department Minister TJ Lalnuntluanga chuan sorkar kum kalta chhung khan an department tana sorkarin revenue target a tuksak chu zaa 22.48-in a khum tih sawiin, “Transport department chu ‘hloh department’ tiin sawi thin ni mah se, sorkar department zinga sorkara chhiah chhung lut tam ber pawl a ni,” a ti.
Nimin khan Aizawl Press Club-ah thu thar thehdarhtute kawmin TJ Lalnuntluanga hian kum 2018-2023 chhunga a enkawl transport department hmalakna hrang hrangte a sawi fiah a. He huna a sawi danin, sorkar kum kal ta (2022-2023)-a department tana sorkarin chhiah a tuk, revenue target chu Rs nuai 4,003.21 a ni a. Rs nuai 4,903.34 hmuh niin an target hi Rs 900.13 (22.46%)-in an khum a. Tun sorkar kum kal mek 2023-2024-ah hian sorkarin chhiah a bituksak, Rs nuai 5,000 pawh an tlin ngei an beisei.
Transport minister sawi danin Vahan database-ah hian lirthei kum 15 tling tawh, registration renew zui lo thahnem tak awmte chu then faia hmalak a ni a. December 31, 2019-a vehicle registration thi tawh 45,646 zet chu January 27, 2020 khan a neitute hnenah December 15, 2020 ral hmaa registration tithar tura hriattirna pek an ni a. Hun tiam chhunga tifel lo lirthei 43,137-te chu February 18, 2022 khan blacklist an ni.
Hei bakah January 2021 atanga December 31, 2021 chhunga lirthei registration thi 8,708-te chu April 7, 2022-ah demand notice pek leh niin, mi eng emaw zatin an tifel a, tizui lo lirthei zingah mi mal lirthei 8,365 awmin, sorkar lirthei 130 an awm bawk.
A sawi zel danin tun dinhmunah Mizorama district tinah lirthei khu endikna bun vek a ni a. Mipuiten awlsam zawka lirtheite an endiktir theih nan transport department leh Mizoram Pollution Control Board tangkawp hmalaknain Central Workshop, Hlimenah Aizawl south lamte tana awlsam zawk nan sorkar atanga phalna an hmuh angin din ve thuai tura hma lak mek a ni.
Mi mal tana eizawnna tha leh tangkai a nih theih nan tunah hian Siaha, Lawngtlai, Serchhip, Champhai leh Mamit district-ah te lirthei khu endik hna hi District Transport Office atanga mi mal hnena hlan chhawng turin district tin atanga a diltu hnena work order pek fel tawh a ni.
Sorkarin Mizoram hmun hrang hrang pali – Vairengte, Rengtekawn (Kolasib), Kanhmun leh Champhaiah te weightbridge bun tura hmalak a nih thu sawiin, “Bungraw phur chi lirthei, an registration certificate-a phurh theih zat inziak/phal chin baka ritphur thinten nasa taka kawng an rah chhiat thin avangin dan phal chin baka rit phurte chungah dan ang taka hma lak a ni ang,” a ti.
Transport department-in Mizoram chhunga mipuite chetvelna a awlsam zawkna atan ropeway siam tumin kawng hrang hrangin ngaihtuahna a seng tih sawiin TJ Lalnuntluanga chuan, “Pilot project atan Aizawl leh a chhehvelah hmalak hmasak phawt nise tih a ni a. Hemi bawhzui hian hma hrang hrang lak chhoh a ni a. Mizoram sorkar hnuaia UD&PA hmalakna hi Aizawl Sustainable Urban Transport Project kalpui mek a ni. He project hian ropeway lamte pawh a kaihhnawih avangin, he project khawihtu Mott McDonald te feasibility report ngaihchan mek a ni,” a ti.
Inland Water Transport (IWT) chungchang sawiin TJ Lalnuntluanga chuan, IWT hi Mizoram PWD hnen atangin Augusr 30, 2019 khan transport dept-in mawhphurhna a lak fel atangin Mizorama lui hman tangkai theihte dap chhuakin theihtawpin hmalak nghal a ni a. Mahse, Covid-19 lengin kum hnih zet a chenchilh avangin duhthusamin hmalak chak theih a ni lo va. Chuti chung chuan Tlawng lui kaltlangin Assam nena inkalpawhna turte, Myanmar leh Bangladesh te nena insumdawntawnna tih hmasawnna atan Chhimtuipui lui leh Khawthlangtuipui luiah te IWT project kalpui niin, hmalak mek a nih thu a sawi.