Manchester City midfielder Bernardo Silva chuan kum khatin contract a pawtsei a, Etihad Stadium-ah kum 2026 thleng a ziah belh.
Portugal midfielder contract neihlai hi kum 2025 nipui a zo tur a ni a, hei vang hian a hmalam hun in sawi zui a hlawh hle.
Kum 29 mi hi Barcelona nen tunhnai kum hnih chhung sawizawm a ni thin a, kuminah Paris Saint-Germain leh Al-Hilal nen sawizawm an ni bawk.
“Manchester City-ah kum ruk duhawm tak ka hmang tawh a, ka la cham zui zel thei tur hi ka lawm hle.”
“Season hmasa a treble champion nih kha ka tan thil hlu tak a ni a, khatianga hlawhtling tura tumna sang tak nei squad a tel hi thil phurawm tak a ni.” a ti a.
“Hlawhtlinna tem tawh chuan duh belh zelna lian tak a awm a, he club hian chutiang ti thei tur dinhmunah chuan min dah a ni.” tiin a sawi.
City hian tun nnipuiah captain Ilkay Gundogan leh winger Riyad Mahrez te an chhuahtir a, defender Aymeric Laporte pawhin Al-Nassr a zawm fel.
Hei vang hian an hnena tawnhriat nei hnem tawh player pawimawh hi chelh an duh.
Tun nipuiah Chelsea atang Mateo Kovacic an lalut a, Rennes leh Belgium winger Jeremy Doku lalut turin inremna an nei bawk.
Spain defender Aymeric Laporte-a’n Euro maktaduai 27.5 in Al-Nassr a zawm a. A contract ziah rei zawng erawh puanzar a ni lo.
Kum 29 mi hian kum 2018 January khan Athletic Bilbao atangin a hunlai a club chanchin a player manto ber ni turin Manchester City a zawm a. An hnena a cham chhungin trophy lian 12 a la hman.
Season liamta erawhin first team-ah khelhna chang tam lovin vawi 24 chauh a inlan a, hei vang hian chhuah a thlang.