Aizawl: Sairang bul rel kawng siam lai lei chim vanga nunna chânte ruang an khuaa thawn danah contractor-te laka lungawi loh avang leh chhiatna thlen danah thil fel lo awm nia hriat avangin West Bengal atanga BJP hotu, Ziarul Haque, Member, Disha Committee, Ministry of Rural Development chuan complaint siam an tum.
Rel kawng siam meka chhiatna thlengah khan West Bengal mi 18 an thi a, hliam enkawl lai pahnih an awm mek bawk.
Vanduaina tawkte chungchang ngaihvenin Inrinni khan Haque chuan Mizoram thlengin BJP Mizoramin an lo dawngsawng a. Nimin khan Mizoram BJP Spokesperson Lalremsangi Fanai nen Civil Hospital, Aizawl-a hliam tuarte tlawhin, hliam tuar chhungte an kawm a. Hliam tuarte chu BJP West Bengal leh Mizoram chuan an mamawhna apiangah pui tura an awm thu an hrilh.
Nimin vek khan BJP hruaitute hian rel kawng chima mawhphurtu contractor, ABCI pawh Aizawla an office, ISPAT Office-ah hmuin rel kawng lei chima vanduaina thleng chu engineering & technical fail vang a nih ngei an rin thu an hrilh a, ruang chhe tawh takin Pathianni khan Malda, West Bengal thlengin ruangte chu thlawhtheihnaa an thawn loh chungchangah contractor-in an tih tur an tih loh thu leh hnathawktute himna titha tawk lo leh thihna hial thlennaa contractor hmalak danah a tul dan ang zela dan anga an laka complaint an siam tur thu an hrilh bawk.