MNF Adviser Lalruatkima chuan Covid-19 leng avangin MNF sorkar chu kum hnih chhung a khawngkhawbai a. An hmalakna chhunzawm turin kum nga dang an sorkar leh dawn niin a sawi.
Thawhtannia Mizo Hnam Run chhung inkhawmah thu sawiin I&PR Minister Lalruatkima hian MNF sorkar thil tih tam tak leh hmachhawpte enin hmabak chhunzawm ngai tam tak a awm tih a sawi a, “Ram leh hnam himna kawngah pawh MNF sorkar lo se, engtin nge kan nationalism hi a awm ang?” tiin, MNF chu hnam thuthlung kengtu an nih thu leh hnam himna chu MNF-ah a awm tih a sawi.
Lalruatkima chuan MNF sorkar lo se Assam lamin Vairengte chhak lam an rawn thut tawh mai thei tih a sawi a. Assam sorkarin duh hun huna Mizoram a hrek loh nan buhfai kudam sak belh zel a nih bakah Sairang Sihhmuiah oil depot dah tura indawr mek a nih thu te a sawi a. Bru chungchangah pawh MNF a lo sorkar a, theihtawpa hma an lakna zatah kum 2023 inthlanah chuan special polling booth siam a ngaih tawh loh tur thu leh Tuikuk vanga kawngzawh a ngaih tawh loh tur thu a sawi.
ZPM party chungchang sawiin Lalruatkima hian, “Candidate an han set a, an buai em em a. Tling zo lo tura an ngaihte an thlak a. Damlo an awm leh dawn em tiin kan thlir,” a ti a. Congress party chungchang pawh sawiin, “Congress pawh an party senior-hoten bhavan an tlawh duh lo, an hotupa ber a dictator lutuk an ti,” a ti.
MNF sorkar thar hmachhawpah chuan hna lak a harsat laiin hna ruak 600 chuang hnawh khahna tur finance lamin an phalsak vek tawh thu a sawi bawk.
Inkhawm hi BC Lalbiakngura, GS, MNF Gen Hqrs-in a kaihruai a ni.