Russian President Vladimir Putin chuan Indian Prime Minister Narendra Modi hnenah thla thara Delhi-a G20 Summit neih turah a tel thei dawn lo tih a hrilh.
India hian kumin summit a thleng dawn a, an khawpui ber, Delhi-ah September 9-10 chhung hian neih a ni ang.
Putin-a hian Modi-a hi telephone-a biain a theih loh tur thu leh Foreign Minister Sergei Lavrov chu a aiawhin summit-ah hian a tel tur thu a hrilh a ni.
An inbiaknaah hian ram hruaitu pahnihte hian ‘anmahni inkar thil bakah khawvel huap thil’ an sawi dun tih India chuan thuchhuah a siamah a tar lang.
Russian sorkar thupuangtu chuan kar hmasaah tawh khan Putin-a hi ‘tih tur a ngah em avangin’ summit-ah hian a tel thei dawn lo tih a lo sawi tawh a ni.
G20-ah hian khawvel ram hausa 19 leh European Union an tel a. India hi tuna G20 president nihna chelh mektu a ni a, member-te hi president an in nih chhawk thin a ni.
Russia-in Ukraine a rûn mek chu Delhi-a summit-ah hian an thu khel tur langsar ber a ni dawn a. Khawvel ram lian tak tak hruaitu, US President Joe Biden leh UK Prime Minister Rishi Sunak te pawh an tel dawn a ni.
Kar hmasa khan Putin-a hi Brics summit-ah a lo tel tawh a. Brics hi Brazil, Russia, India, China leh South Africa tihna niin Johannesburg-a intawh khawm an neihah hian video link hmangin a tel a, ram pawnah hian International Criminal Court (ICC)-in man theihna thu a chhuah avangin a kal lo a ni.
ICC hian Putin-a hi Ukraine a rûnnaah dan a bawhchhia tia puhin manna tur thu a chhuah a ni.
Thawhtannia thuchhuah a siamah India chuan Modi-a pawhin ‘Russia thutlukna a hre thiam’ tih a sawi a. Delhi-in G20 president nihna a chelh chhunga Putin-a’n a thlawpnaah lawm thu a hrilh bawk.
Russia-in thuchhuah an siamah ve thung chuan G20 summit-a Putin-a a tel loh tur thu hi an tar lang ve lo va; mahse, ram pahnihte hian ‘Russia-in Brics chairman a nihna
ha taka thawh dun an tum thu an sawi’ tih an tar lang a. Moscow hian Brics hi January 1 atangin a hruai tan dawn a ni.
“Tuna Russian-Indian inkungkaihna pawh an sawi dun a, thawhhona leh inzawmna nghet tak an nei zel a ni,” an ti.