Aizawl: National Highway 302 chhe zual lai thawm tha tura Khawthlangtuipui Group YMA Monitoring Committee for NH 302, Tlabung Village Council leh Zodin Village Council-ten nimina hnatlangpui an huaihawtah mi 700 bawr vel an thawkchhuak.
Hnatlangpuia thawkchhuakte hi hlawm hnihah inthenin zing dar 7 vela thawk chhuak leh chaw ei kham chawhma dar 10 vela thawkchhuak an awm a, Tlabung VC leh Zodin VC huam chhung bakah Tuichawng VC atangin mi 700 chuang thawkchhuak a ni.
Mi tlawmngai thawkchhuakte chuan kawng siamna atana hman theih tur bawngtuthlawh, suahdur leh tuboh nen an thawkchhuak a, khaw chhehvel VC hrang hrang – Tippereghat, Khojoysury, Tablabagh, Nunsury I leh Nunsury II ten sum leh pai an thawh bakah PWD-ten lirthei leh hnathawktu an thawh bawk.
Anni bakah hian mi mal leh pawl anga sum leh pai thawh thahnem tak an awm.
NH 302 hi National Highways & Infrastructure Development Corporation Ltd enkawl lai niin tun hnai tia sawi theih, thla liam ta khan contractor thar, BRN Infrastructures Pvt. Ltd. kutah hlan a ni a, he kawng laih hna hi contractor hmasa, SRK Construction & Projects Pvt. Ltd-ten an thawh muan bakah hnathawh dan a dik tawk loh avangin kum 2021 atang khan kum tin fur a thlen apiangin mipuiten harsatna an lo tawk tawh thin niin hnatlang huaihawttute chuan an sawi.
Kuminah phei chuan mipuiten harsatna lian tham lehzual tawkin, ni tin deuhthaw lirthei a tan bakah Tlabung leh Lunglei inkar, km 95 vela hla chu khualzinten ni khata an ban hman loh chang a awm hial a ni.