Aizawl: Mamit Chhim veng All NGO leh VC-te huaihawtin nimin khan an veng mipuiten an veng naupang Lalremruata (11) tualthihna an demzia lantir nan kawng an zawh a, hetihlai hian Police chuan Lalremruata hi hursualna kaihhnawiha thah niin an sawi.
Kawngzawh hi chawhma dar 10:30-ah Mamit Hmunsam vengah tanin Field veng thleng neih a ni a, mi hrang hrangin thu sawiin, kawngzawhnaa tel an thahnem hle a. Lalremruata, rawng taka thah a nih an dem thu banner leh placard-a ziakte an keng a, kawngzawh chhungin veng chhung dawrte pawh khar vek a ni a, veng dang atang pawhin kawngzawhnaah hian mi eng emaw zat an tel nia thudawn a ni.
Kawngzawhtute hian resolution pali siamin an pass a, vohbik, Lalremruata rawng taka thattu, R.Lalrinchhana chuan a dam chhungin Chhimveng huam chhung a rap tawh tur a ni lo tihte, R.Lalrinchhana’n a tualthah chhan a sawiah an lungawi tawk loh thu leh hei aia a thah chhan hi chiang zawka hriat a nih theih nana chhuichhuak tura thuneitute an phut thu te, a na thei ang bera tualthattu hrem an phutna te, tualthattu hian thurualpui a neih an rin thu leh arang thei ang bera thuneituten chhuichhuak tura an phutna-te an tar lang a ni.
Hetihlai hian nimina Mizoram Police-in thuchhuah an siam danin August 25, 2023 khan R.Lalrinchhana (kum 20) R.Remlalnghaka fapa, High School Veng, Mamit chuan Francis Lalremruata hi August 17, 2023 zan khan Nghaka Motor Works, Mamit chhungah hur sualna kaihhnawiha a thah ngei thu inpuangin, evidence leh thil dangte pawh a inpuanna behchhan hian mana lakkhawm a ni.
Court-a hruai a nih hnuah R. Lalrinchhana hi Central Jail, Aizawlah August 26, 2023 khan dah luh a ni tiin an tar lang.