Aizawl : Kolasib Auto Rickshaw Drivers Union (KARDU) ten Kolasib khaw chhunga Auto Rickshaw permit thar pekchhuah tum sut tura nawr nana District Transports Office, Kolasib Office a hnathawktute pisa kal tur an dan chu an chhunzawm zel.
KARDU hian Kolasib khaw chhunga Auto Rickshaw permit a ruala mi 112 pekchhuah avanga an duhlohna lantir nan August 24, 2023 atang khan Kolasib DTO Office a thawktu pisa kai tur an dang a. An beisei anga chhanna an la hmuh loh avangin niminah pawh pisa kai turte hi an la dang chhunzawm a ni.
Kolasib DTO-a thawktu pisa kai tur an dan chungchangah KARDU President Ramfangzaua Ralte chuan, Auto Rickshaw permit pekchhuah hrim hrim hi an dodal a nih loh thu a sawi a. Eizawnna tur atana mamawh ngawih ngawihte permit an pe pawh tha an tih thu te sawiin, tun tuma permit an pek zingah hian sorkar hnathawk te, rorel lai party block hruaitu, in leh lo tha tak tak leh JCB nei pha hial te bakah eizawnna atana Auro Rickshaw permit mamawh miah lo tih chiangsa te an tel chu, induhsak uchuak leh a mamawh lo te hnena permit inpek chu tha an tih loh thu a sawi.
Ramfangzauva Ralte chuan permit pek thar zingah chhungkhat atanga mi pahnih hmute, pafa a hmute, unaua hmute pawh an awmin, Auto Rickshaw permit pahnih nei tawh sa pek leh te pawh an awm tih sawiin, “A dinna tur stand-ah dinna pawh kan inchan tawh loh laia, hetianga a ruala permit thar 112 ngawt pek hian Auto Rickshaw hmanga eizawngtu te tan harsatna a siam nasa dawn a ni,” a ti.
KARDU hruaitute chuan an lungawi lohna thu hi Chief Minister hnenah pawh an thlen tawh thu sawiin, CM chuan an nawrh titawp turin a lo ngen tih an sawi a. Mahse an thil phut engmah a hlawhtlinna lam hawi a sawi loh avangin an hmalakna kalpui mek chu tihtawpna chi-ah an ngai lo tih an sawi bawk.