Aizawl : Mamit district-a khaw pahniha Village Council By-Election neihna tura hman tur Final Electoral Rolls-2023 chu nimin khan tlangzarh a ni a. Khawrihnim-ah vote nei mipa 320 leh hmeichhia 331, an vaiin 651 an awm a, Lianbuang (Bekabekya)-ah vote nei mipa 129 leh hmeichhia 117, an vaiin mi 246 an awm.
Final Electoral Rolls hi political party hrang hrangte hnenah pawh hlan nghal a ni.
Nimin vek khan Siaha-ah pawh Siaha East I biala MDC bye-election leh leh New Saikao Village Council bye -election-a hman tur Final Electoral Roll tlangzarh a ni a, political party hrang hrang te hlan nghal a ni bawk.
Addl. DEO Lalnunmawii’n Electoral Roll-a hun taka peihfel a nih theih na tura theihtawp chhuaha thawktu election official- ERO, AERO, BLO leh Political Party-te inpekna fakawm a tih thu a sawi a. India ram chu mipui thlan tlinte rorelna ram a nih angin mipui ten an aiawh an thlan thin chu thilpawimawh tak a nih thu leh inthlanna felfai leh thianghlim tak neih erawh a pawimawh hle thu a sawi.
By-election neih tur ah pawh mipuite chu thianghlim taka vote thlak turin a chah a. Political party hrang hrang leh NGO-te thawhpuina tha tak nen by-election lo awm tur hmachhawn a tul thu sawiin, party tin leh NGO- te chu tha- whpuiah a sawm nghal.
Election Officer Vanlalchhuanliana’n Electoral Roll buatsaih a nih dan tlangpui a sawifiah a, Final Electoral Roll tlangzarh a nih theihna tura hmalakna hrang hrang a sawi.
Final Electoral Roll atanga a lan danin Siaha East I MDC bialah vote nei mipa 1307, hmeichhia 1537, an vaiin vote nei mi 2844 an awm a, New Saikao Village Council ah vote nei mipa 55, hmeichhia 60, an vaiin vote nei mi 115 an awm bawk.