Aizawl : 2008 Mizoram Govt. Lumpsum Aided Higher Secondary School Association (MIGLAHSSA) chuan ‘No Teaching Day’ an kalpui hnuah sorkar atanga an thil ngiat chungchangah thu lawmawm an dawn loh avangin thawhlehni atang khan tiam chin awm lovin an school pakuate an khar tan.
MIGLAHSSA chuan, kum 2018 MLA inthlan dawna Adhoc ngiat a movemnet na tak – ni 41 school khar, road block leh khaw chhunga sorkar pisa-te an khar hnuah, Aizawla kawng zawh tura an inruahman laiin tuna MNF sorkarin an tlin phawt chuan an thil ngiat te an tihhlawhtlin ngei tur thu an hrilh niin an sawi.
Sorkar thar a pian veleh tuna Chief Minister pawh an hmu nghal tih sawiin MIGLAHSSA chuan, “Inthlan hmaa kan boruak leh a ministry hnuaia beiseina sang tak kan neih thu te kan sawi a. Kan thil ngiat Adhoc Grant-in-Aid pawh remchang hmasa bera min tihsak tura ngen nawn leh niin lawm takin kan inbia a ni,” an ti.
CM nena an inbiak hnuah Education Minister pawh MIGLAHSSA leh school mal Managing Board, party hruaitu ten vawi tam tak an hmuh thu sawiin, “Beiseina sang tak nen kan Adhoc hun thlirin kan haw thin. Mahse, hun tepter tawh takah school upgradation kalpui an nih dawn tak tak meuh chuan sorkar sum harsatzia leh sumin min daih ve tak loh thu hriat a ni leh si,” an ti bawk.
Sorkarin sum an harsat thu an sawi chu an hriat thin thu sawiin, “Sorkar aiin kum 20 zet school lo hahpui tawhtu thingtlang khaw mipuite hi kan rethei zawk tih hi kan sorkar pawh hian min hriatpui ve se kan duh,” tiin, khawtlang mamawhna a san em avangin sorkar chak tak pawh hian a tiam tawh angin Adhoc Grant-in-Aid tura a ngaihna zawnpui theih an rin thu an sawi bawk.