Aizawl : Rajya Sabha member K Vanlalvena chuan Mizo nationalism leh Mizo inpumkhatna tichhe zawnga thusawi leh ziak kawngah fimkhur a tul thu a sawi.
Thawhlehni khan Saikuti Hall, Lunglei-ah Sports & Youth Services Department leh Mizo Zirlai Pawl buatsaih ‘Youth 20 Mizoram, Meet on Nationalism, Patriotism & Development’ hun hman a ni a. He huna khuallian K.Vanlalvena chuan Prime Minister Narendra Modi hi Indian nationalism nge Hindu nationalism a nih a ngaihtuah fo thin thu a sawi a. A thu sawi tam takah India tih aiah Hindustan tih a hmang thin chu, Hindustan rama India siam a tum a nih chuan Mizo te hi an tel ve thei dawn lo niin a sawi.
K Vanlalvena chuan Mizo nationalism chu Mizote hi tu thuhnuaiah mah awm lo va, mahnia ro in rela, mahni keia din duh tlatna thinlung hrilhfiahnaah a ngaih tlat thu a sawi a. “Hei hi ka thinlunga riak reng a ni a, a reh maiin ka ring lo. Engtik niah emaw chuan ram khat niin kan la awmkhawm ang a, eng hmingpuin nge kan la dinchhuah dawn tih erawh chunglam thu thu a ni. Kan insuihkhawm a, rorelna pakhat hnuaiah mahnia ro inrela kan awm hi ka beisei tlat a ni,” a ti.
MZP Hqrs., Lunglei, President Lalpeksanga Chenkual kaihhruai inkhawmah hian Lalhruaitluanga Chawngte, Adviser, MZP pawhin thu a sawi bawk.