AIZAWL: Tun hnaiah Manipur boruak a lum chho leh hle a, Khousabung khua leh a chhehvelah Zohnahthlak leh Meiteite inkahnaah Zohnahthlak hliam tuar an awm nual.
Khousabung khaw hotuten an sawi danin Thawhlehni zing khan Zohnahthlak leh Meitei te hi an in kap tan a, hemi nilenga an inkah bakah nimin pawh khan nilengin silai puak ri hriat tur a awm.
Hnam pahnih inkahnaah hian Zohnahthlak hliam tuar mi panga an awm tawh a, Zohnahthlak volunteer zingah nunna chân an la awm lo nia hriat a ni a; Meitei lam dinhmun erawh hriat a ni lo.
Khousabung khaw hotuten an sawi danin he inkahna thlengah hian Meitei lamin silai an hmet puak hmasa a, Zo tlangvalten Meitei-te hi chhang letin inkahna nasa tak hi a thleng chhunzawm ta a ni.
Thawhtanni zan pawh khan Kangvai khua leh a chhehvelah Metei-te chu luh tumin silai an hmet puak a. Helai chhehvela duty India Army-te nen nasa takin an inkap a, sipai leh Meitei lamah nunna chân an awm leh awm loh hriat a ni lo.
Khousabung khaw chhehvel hi Zohnahthlakte chen tamna hmun a ni a, buaina a chhuah tan tirh pawha an lo inkah fo tawhna hmun a ni.
Khousabung khuaah hian duty centre a awm a, a chhehvel khaw paruk vel huamin volunteer-ten chung khuate chu an veng a. Tun hnaiah inkahna nasa tak a thlen leh tak avang hian he khaw chhehvela volunteer duty-te pui turin Lamka leh khaw dang atangin Zo tlangval rual an fuan khawm mek a ni.