Aizawl: ZPM Leader Lalduhoma chuan MNF leh Congress te chu Pathianin mal a lo sawm tawhnain an liampui mek a, tunah hian ZPM huna a lo inher chhuak ve tan niin a sawi.
Lunglei West bial chhung, Buarpui tlangdung tlawha vantlang inkhawm an buatsaihnaah Lalduhoma chuan MNF leh Congress te hun a liam mek a, chu chu mipui hmuh dan a nih thu sawiin, “Ram kalphung a inher a, hemi ang hian kan inher rem a tul a. Pathianin a hun laia a ruatte hi rah beh theih a ni lo va. MNF leh Congress te hi Pathianin mal a lo sawm tawh a, vawiinah hian ZPM hun a lo inher chhuak ve mek niin a lang,” a ti.
Lalduhoma chuan party ral lama awm hi chhungkua, khawtlang leh ram tan hlutna an nei lo tih sawiin, ZPM hian party danga mi tangkai tak takte hi an mamawh a, an party chu zawma thawhpui se an duh tih a sawi.
“Kan policy vahvaihpui thin chu a lo hlawhtling ve dawn ta a, chung lamin hmanrua atana min buatsaihah hian tel vek turin mipuite ka sawm a ni,” a ti.
Pathian leh mipui zarah ZPM-in sorkarna an chang ve a nih chuan Mizoram budget pharh turah leiba nasa taka delhin bul tan ni mah se, Delhi leh state dangte pawh roreltute inthlakin hmasawn zawngin an kal tawh a. ZPM pawh kum hnih khat hnuah chuan insiam that theih tura hnathawkin hmalak an tum tih a sawi bawk.
ZPM chuan bana kaih (hand holding) policy an kalpui turah bul tanna hlawhtlinpui tham, mi hlawhtling tur thlangin an kalpui dawn a, hetah hian thlan tur trade tam tak a awm thei tih a sawi.
Thalaite tan pawh eizawnna tur kawng tam tak siamsakin loan thlengin ngaihtuahpui dan an dap tur thu te, central-in loan a rulh thensakna tur project thlengin SBI-a hotute atanga ruahmansak thei tur an awm thu a sawi.